Semeytany.kz — облыс әкімі Берік Уәли өңірдің дамуына еңбегі сіңген ардақты ақсақал Болат Сапорұлымен, ақын әрі мәдениеттанушы Құсмілия Нұрқасыммен және журналист Сүйеубай Байқадиевпен кездесті.
Кездесуге қатысқан Болат Сапорұлы – Шығыс Қазақстан облысы, Бородулиха және Тарбағатай аудандарының Құрметті азаматы. Ол «Парасат», «Құрмет» ордендерімен, сондай-ақ «Абай облысына сіңірген еңбегі үшін» төсбелгісімен марапатталған. Еңбек жолында Бородулиха мен Ақсуат аудандарында басшылық қызметтер атқарып, ауыл шаруашылығын реформалау, әлеуметтік нысандарды сақтап қалу, білім мен денсаулық сақтау салаларын дамыту бағытында елеулі үлес қосқаны айтылды.
Жиында зиялы қауым өкілдері Мемлекет басшысы Қасым-Жомарт Тоқаевтың «Түркістан» газетінде жарияланған сұхбатында көтерілген мәселелер төңірегінде пікір білдірді. Болат Сапорұлы өңірдің әлеуметтік-экономикалық дамуына қатысты ойларын ортаға салса, Қазақстанның Құрметті журналисі Сүйеубай Байқадиев пен мәдениет қайраткері Құсмілия Нұрқасым мәдениет, әдебиет, руханият саласын ілгерілету, алаш қайраткерлерінің мұрасын кеңінен насихаттау және олардың есімдерін ұлықтау бағытындағы ұсыныстарын жеткізді.
Өз кезегінде аймақ басшысы өңірде жүзеге асып жатқан ірі жобаларға тоқталып, Президенттің қолдауымен басталған «Абайға құрмет» акциясының мән-маңызын атап өтті. Сонымен бірге мәдениет саласында қолға алынған игі істер мен жаңа бастамалардың жалғасатынын айтып, кездесуде көтерілген ұсыныстар назарға алынып, алдағы жұмыс жоспарына енгізілетінін жеткізді.
Еске салсақ, Мемлекет басшысының тапсырмасына сай Абайдың 180 жылдығы өткен жылы тұңғыш рет 10 күндік форматта аталып өтіп, мәдени-рухани, танымдық және интеллектуалдық іс-шаралар ұйымдастырылған еді. Облыс әкімінің қолдауымен «Абай жолы» кітапханасы жобасы аясында Семей өңірінен шыққан 19 автордың 25 кітабы жарық көрді. Сондай-ақ өңірдегі 8 мәдени нысанда ағымдағы және күрделі жөндеу жұмыстары жүргізіліп, 100 орындық екі ауылдық клуб ел игілігіне берілді. Биыл да бұл бағыттағы жұмыстар жалғасады.
