Semeytany.kz — Абай облысының әкімі Берік Уәли белгілі ақын, драматург, Мемлекеттік сыйлықтың иегері Иранбек Оразбаевпен кездесті.
Кездесу барысында Иранбек Әбітайұлы Мемлекет басшысы Қасым-Жомарт Тоқаевтың «Түркістан» газетінде жарияланған сұхбатында көтерілген мәселелерге қатысты өз көзқарасын білдіріп, өңірдің тарихы мен мәдениеті, әдебиеті мен руханиятына байланысты ой-пікірлерін ортаға салды. Сондай-ақ Абайдың 180 жылдығы жоғары деңгейде өтіп, мазмұнды шаралармен елге пайдалы істер атқарылғанын атап өтті.
Аймақ басшысы өз кезегінде облыста жүзеге асып жатқан жұмыстарға, Президенттің қолдауымен басталған «Абайға құрмет» акциясына, мәдениет саласындағы игі бастамаларға тоқталып, кездесуде айтылған ұсыныстардың назарға алынып, жұмыс жоспарына енгізілетінін жеткізді.
Еске сала кетейік, Мемлекет басшысының тапсырмасына сай Абайдың 180 жылдығы алғаш рет 10 күндік форматта аталып өтіп, түрлі мәдени-рухани, танымдық және интеллектуалдық іс-шаралар ұйымдастырылған болатын. Облыс әкімінің қолдауымен іске асқан «Абай жолы» кітапханасы жобасы аясында Семей өңірінен шыққан 19 автордың 25 кітабы жарық көрді. Бұған қоса өңірдегі 8 мәдени нысанда ағымдағы және күрделі жөндеу жұмыстары жүргізіліп, 100 орындық екі ауылдық клуб ашылды.
Биыл да осы бағыттағы жұмыстардың жалғасатыны айтылды.
