Семей қаласы әкімдігінде кәсіпкерлер құқықтарын қорғау бойынша ведомствоаралық комиссияның отырысы өтті. Кездесуге Шығыс Қазақстан облысының прокуроры Бағбан Таимбетов, ШҚО кәсіпкерлік және индустриялық — инновациялық даму басқармасының басшысы Шәкәрім Бұқтығұтов, қала басшысы Айбек Кәрімов, Шығыс Қазақстан облыстық кәсіпкерлер палатасының жетекшісі Игорь Шацкий, аталмыш ұйымның аймақтық кеңесінің төрағасы Әсемхан Досқожанов пен қалалық прокуратура, Ішкі істер басқармасының, шағын және орта бизнес өкілдері қатысты. Басқосу барысында бизнес өкілдерінің жұмысына қатысты өзекті мәселелер мен олардың әртүрлі мазмұндағы өтініштері талқыланды.
{jcomments on}Кездесу барысында қарастырылған сұрақтардың бірі Ертіс өзенінің жағалауын бекітуге қатысты болды. Бұл ретте қала әкімі Айбек Кәрімов жүргізілуге тиіс жұмыстардың жобалық-сметалық құжаттамасы әзірленгенін атап өтті. Енді арнайы шараларды жүзеге асыру үшін облыстық және республикалық бюджеттен қаражат бөлінеді деп күтілуде.
Кездесуде сондай-ақ бейберекет сауда нүктелерінің заңсыз әрекеттері туралы мәселе қарастырылды. Осыған қатысты сауал қойған жеке кәсіпкер бейберекет сауда нүктелерінің көбеюі өзінің ісіне зиянын тигізіп отырғанын алға тартып, нақты шаралар қолдануды өтінді. Мәселенің мән-жайына қаныққан Шығыс Қазақстан облысының прокуроры Бағбан Таимбетов олқылықты түзету бойынша қалалық прокуратура қызметкерлеріне тапсырмалар жүктеді.
— Бұл мәселеге қатысты жұмыстарды атқаруға үш апта мерзім беремін. Осы уақыт аралығында нақты нәтиже шығару керек. Ары қарай да бұл мәселені бақылауда ұстау қажет. Себебі бір рет келіп тәртіп орнатқаннан нәтиже шығуы қиын. Сондықтан жұмыс қорытындысы бойынша маған есеп бере-сіздер,-деді облыс прокуроры.
Сонымен қатар кәсіпкерлер тарапынан электр қуатын тасымалдаушы кәсіпорындардың әрекеттеріне қатысты шағымдар қарастырылды. Атап айтқанда, «Семей саяхат» фирмасының өкілі «Шығыс энерготрейд» компаниясымен жасалған келісімшартта әрбір он күн сайын қызмет ақысын төлеу қарастырылғанымен, әрбір он күнде тұтынылған электр қуатының өлшемін алу жағы қамтылмағанын айтты. Жиынға қатысушылар мұндай жағдай қазіргі таңда жиі кездесетінін тілге тиек етті. Өз кезегінде Шығыс Қазақстан облыстық кәсіпкерлер палатасының жетекшісі Игорь Шацкий аталмыш мәселенің өзекті екенін атап өтті. Сондай-ақ ол электр қуатын тасымалдаушы кәсіпорын тарапынан жіберілетін мұндай олқылықты түзету қажеттігіне де тоқталды.
— Қазір облыс бойынша декада сайын қызмет ақысын төлеу қарастырылған, бірақ декада сайын тұтыныл-ған электр қуатының өлшемін алу қамтылмаған келісімшарттарға қол қою ұсынылып келеді. Бірақ бұл кәсіпкерлер үшін ыңғайсыз. Былайша айтқанда, бұл көрсетілер қызмет түрі үшін жасырын алдын ала ақы алу үшін жасалған. «Шығыс энерготрейд» кәсіпорны да — біздің палатаның мүшесі. Бірақ біз үшін көпшіліктің мүддесі қашан да маңызды,- деді Шығыс Қазақстан облыстық кәсіпкерлер палатасының жетекшісі.
Жалпы, жиын барысында оннан астам сұрақ қарастырылды. Барлығы бойынша нақты жауаптар мен тиісті органдарға тапсырмалар берілді. Кездесуге қатысқан кәсіпкерлер тарапынан да бірқатар ұсыныстар айтылды.
Мирас ҚҰСАЙЫН,
«Семей таңы»
