26 наурыз күні, шаһарда елімізде өтетін кезектен тыс Президент сайлауына орай, форум ұйымдастырылды. Шараға оқу орындарының студенттері, зиялы қауым мен қоғамдық ұйымдар өкілдері қатысты. Форум аясында митинг пен автошеру, флешмоб өткізілді.
{jcomments on}«Біздің таңдауымыз – тұрақтылық», «Бірлік пен бейбітшілік – біздің басты байлығымыз», «Елімнің тағдыры – менің тағдырым». Форум аясында қаламыздың Орталық алаңында өткізілген митингке жиналған жастар осындай ұрандар жазылған плакаттар ұстап тұрды. Шараның салтанатты бөлігі автошеруден басталды. Жиырмадан астам автокөлік Түйемойнақ аралынан бастап орталық алаңға дейін жүріп өтті.
Шараның ашылу салтанатында бірінші болып сөз алған Қазақстан Республикасының Президенттігіне үміткер Н. Ә. Назар-баевтың Семей қаласы бойынша қоғамдық штабының төрағасы Шәріпбек Әмірбеков биылғы кезектен тыс Президент сайлауының еліміз үшін үлкен мәнге ие екенін, сол себепті Қазақстанның әрбір азаматы аталмыш саяси науқанға белсене қатысуы керек екенін атап өтті.
— Бүгінде Қазақстанды бүкіл әлем жұртшылығы алдыңғы қатарлы ел ретінде таниды. Қазақстан өз болашағына үлкен сеніммен қарайтын беделді мемлекетке айналып отыр. Біздің еліміз сенімді даму мен өркендеу жолында, сол себепті алда келе жетқан сайлауда Қазақстанның әрбір азаматы саналы, ең бастысы, дұрыс таңдау жасауы керек,- деп атап өтті Шәріпбек Ағабайұлы.
Сайлау науқанына орай өткізілген шараны қолдайтындарын сахна төріне шығып сөз сөйлеген мәдениет ошақтары мен қоғамдық ұйымдар өкілдері де білдірді. Бұл азаматтардың қатарында Абай атындағы театрдың директоры Яков Горельников, Семей қаласы әкімшілігі жанындағы қоғамдық кеңестің төрайымы Жанна Жибраева, Халықаралық «Невада-Семей» антиядролық қозғалысының вице — президенті Сұлтан Картоев, Семей қалалық «Жас Отан» жастар қанатының атқарушы хатшысы Әбділдабек Тұрсынов бар. Орталық алаңға жиналған жұртшылық алдында сөйлеген сөздерінде олар шешуші сәтте әрбір дауыс- тың маңызға ие болатынын тілге тиек ете келе, жастар қауымын, қала тұрғындарын алда келе жатқан сайлау науқанына белсене қатысуға шақырды.
Шара барысында сондай-ақ сахна төрінде «Көк тудың желбірегені», «Жаса, Қазақстан», «Атамекен» сынды патриоттық әндер шырқалды.
Мирас ҚҰСАЙЫН,
«Семей таңы»
