Бүгінгі таңда Семейде қар суынан тазалауға барлық техника жұмылдырылған. Шаһар көшелерінен арнайы су соратын машиналар, су айдайтын қондырғылар, үлкен тиегіштер мен жүк машиналарының қызу жұмыстарын байқауға болады. Қар ерісімен, қала аумағын тазалау жұмыстары қарқын алып, арықтар мен құбырлар, су жинақталатын коллекторлар тазартылуда. Қажет болғанда жерді құрғатып, судың жолын бөгейтін инертті материалдар да жеткілікті.
{jcomments on}Еріген қардың суы қала тұрғындарына қолайсыздық тудыратыны анық. Оның үстіне қызыл су тұрғын үйлерге де қауіп төндіреді. Қазір осы жағдайдың алдын алу мақсатында коммуналдық қызмет мамандары тәуліктің кез келген уақытында үздіксіз жұмыстар атқаруда. Қала әкімі Айбек Кәрімов орталық көшелер мен орталық базар маңы және Дальняя, Мирный кенттерінде болып, су басу қаупі бар аудандарды аралап көріп шықты. Сондай-ақ шаһар басшысы тұрғындармен кездесіп, арыз — шағымдарын тыңдап, жауапты мекемелерге тиісті тапсырмалар жүктеді.
Алдымен Дальняя кентіндегі Лесная көшесінің жағдайымен танысқан Айбек Мүталапханұлы аталмыш көшенің тұрғындарымен кездесіп, көшеге арнайы арықтар салу керектігін, сонда ғана мәселе шешімін табатынын жеткізді.
— Бұл көшеге жөндеу жұмыстарын жүргізіп, жолды биіктетуіміз керек. Дальняя көшесіндегі сияқты жол бойына арнайы арықтар салғанымыз дұрыс болады. Өйткені биіктеген жолдан аққан сулар үйлерді алып кетуі мүмкін. Ал қазір жағдайдан шығудың бір — ақ жолы — суды сорғызып отыру, — деді Айбек Кәрімов.
Ал тұрғындар қызыл суды шығарып жатқан жергілікті билікке ризашылықтарын білдірді. Бұдан кейін әкім аталған ауданда жөндеу жұмыстары жүргізіліп жатқан Дальняя көшесінде болып, өткен жылы салынған арықтардың жұмысын өз көзімен көрді. Кейін Дальняя көшесі мен Шымкент көшесінің қиылысына аялдады. Аталған көшеде жол жөндеу жұмыстары аяқталған. Дегенмен алдағы уақытта су ағатын арықтар салу жұмыстарын жүргізу қажет. Бұл шаруа күн жылысымен қайта жанданады.
— Өткен жылы бұл жерден тіпті өту мүмкін емес еді. Ал қазір жол жөнделіп, ретке келтірілді. Енді былтыр басталған жөндеу жұмыстарын осы жылы аяқтауымыз керек. Бұған міндетті түрде бюджеттен қаражат қарастыратын боламыз. Су ағатын арықтар салатын болсақ, мәселе шешіледі деп ойлаймын, — деді қала әкімі.
Одан кейін Мирный кентіне барған шаһар басшысы аталмыш ауданда көктемде су басатын Макаренко көшесі мен ондағы арықтарды көріп шықты. Жағдаймен танысқаннан кейін сала мамандарына аталған көшені тез арада тегістеп, су ағатын құбырды кеңейтуді тапсырды.
Айта кетуіміз керек, қар суының көбейіп, шалшыққа айналмауы үшін, қала тұрғындары да жауапкершілік танытып, өздерінің аулаға жинал-ған қарларын тазалаулары қажет. Әсіресе шағын және орта кәсіпкерлік иелері өз ғимараттарының аулаларынан үйілген қарды шығарып, су ағатын арықтарды тазарту керектігін ескергендері жөн.
Асан МЫРЗАХАНОВ, «Семей таңы»
