ШҚО Дін істері басқармасының ұйымдастыруымен Семей қаласының Шәкәрім атындағы мемлекеттік университетінде «Қазақстан Республикасының дін саласындағы мемлекеттік саясаты және мемлекеттік органдардың міндеттері» тақырыбында өңірлік семинар өтті.
{jcomments on}Ұйымдастырушылардың айтуынша, шараны өткізудегі мақсат – мемлекеттік қызметкерлер мен мемлекеттік мекемелер басшыларына еліміздің Ата Заңынан бастау алатын діни сенім бостандығын қамтамасыз етудегі мемлекеттік саясаттың негізгі бағыттары және онда орын алатын үдерістер туралы жан-жақты ақпарат беру көрінеді. Бұдан бөлек ҚР «Діни қызмет және діни бірлестіктер туралы» Заң талаптары мен дін саласын реттеуге бағытталған өзге де заңнамалық актілерді орындау мен қоғамдағы конфессияаралық келісім мен ауызбіршілікті сақтау мен нығайтудағы жергілікті биліктің үйлесімді қызмет атқаруын қамтамасыз ету көзделгенін айта кеткен жөн. Шара барысында Қазақ инновациялық гуманитарлық-заң университетінің «Қазақстан жолы» тәрбие-білім орталығының директоры Аман Рахметуллин арнайы дәріс оқыды. Өз сөзінде ол ел ертеңінің жарқын болуын қамтамасыз ету үшін әр азаматтың орын алып жатқан оқиғаларға бей-жай қарамай, тыныштық пен ынтымақтың сақталуына қал-қадерінше үлес қосуы керектігін атап өтті. Сондай-ақ, діни экстремизм мен радикализм, діни терроризм тақырыбына кеңінен тоқтала келе аталмыш құбылыстардың зиянды әсерлері жайлы айтып, қатысушылар назарына осы жайында дәлелді мағлұматтарға толы бейнероликтер мен деректі фильмдерден үзінділер ұсынды.
Аман Қапанұлы жас ұрпақты теріс пиғылды ағымдардан бойларын аулақ ұстайтын етіп рухани тәрбиелеудің мәні жайлы ойымен бөлісті. Өскелең ұрпақтың санасына толеранттылық сияқты маңызды ұғымдарды нықтап орнату – болашақта ел ішінде татулық пен тыныштық тұғырының берік болуының, қоғам тұтастығының арта түсуінің кепілі екенін тілге тиек етті. Сондай-ақ, жас ұрпаққа тәрбие беруде ұстанылуға тиіс төрт идеологиялық қағиданы атап өтті.
— Бірінші бағыт – «Бірлік пен келісім – Қазақстан дамуының негізі», екінші бағыт – «Отансүйгіштік. Ұлттық дәстүр мен мәдениет – бұл ұлтымыздың рухани іргетесы», үшінші идеологиялық ұстаным – «Зайырлы қоғам және жоғары руханилық – біздің басты құндылығымыз», төртінші қағида – «Радикализм және экстремизмге қарсы талмай күрес жүргізу». Осы төрт қағиданы ұстанатын болсақ, келешекте еліміздің ішіндегі тыныштық пен татулықтың, ынтымақ пен береке-бірліктің сақталып қана қоймай, нығая түсуіне, сол арқылы мемлекетіміздің тұрақты түрде өркендеп, дамуына жол ашамыз. Біздің қоғам жаһандық өркениет көшінен қалмай, алдыңғы қатарда болуына мол мүмкіндіктер тудырамыз,- деді Аман Рахметуллин.
Семинар соңында барлық қатысушыларға арнайы сертификаттар мен дін саласындағы мемлекеттік саясат туралы ақпараттар қамтылған кітапшалар, діни экстремизммен күрес жайындағы заңнамалық актілер туралы материалдар, діни экстремизмнің алдын алу бойынша әдістемелік құралдар мен осы тақырып бойынша әзірленген бейнероликтер жазылған дискілер берілді.
Мирас ҚҰСАЙЫН,
«Семей таңы»
