Semeytany.kz — Абай облысының әкімі Берік Уәли Абай ауданында бірнеше жылдан бері аяқталмай, созылып келе жатқан әлеуметтік нысандардың құрылысымен танысып, жауапты басқармаларға бақылауды күшейтуді тапсырды.
Аймақ басшысы алдымен Кеңгірбай би ауылы маңындағы Қарашоқы шатқалында бой көтеріп жатқан балалар лагеріне барды. Бір ауысымда 40 баланы қабылдайтын нысанның құрылысы 2023 жылы басталғанымен, мердігерлердің жауапсыздығынан жұмыс әлі толық аяқталмаған. Қазір ғимаратта жылыту жабдықтарын орнату және ішкі әрлеу жұмыстары қалып отыр. Сонымен қатар лагерь орналасқан аумақта орталықтандырылған ауыз су жүйесі жоқ болғандықтан, су тасымал арқылы жеткізіліп отыр.
Осыған байланысты облыс әкімі мемлекеттік сәулет-құрылыс бақылауы мен құрылыс басқармасына нысанды қатаң қадағалауға алуды міндеттеп, мердігерге жұмысты сапалы әрі жедел тәмамдауды тапсырды. «Мұндағы құрылыс жұмыстарын оқушылардың жазғы демалысына дейін аяқтауымыз керек. Сондықтан жұмысты жандандыру қажет», – деді Берік Уәли.
Сапар барысында аймақ басшысы Көкбай ауылындағы спорт модуліне де барды. Бұл нысан да 2023 жылы басталып, белгіленген мерзімде пайдалануға берілмей қалған. Мердігер ұйым өкілдері жобаны аяқтау үшін қосымша қаржы қажеттігін жеткізген. Жоба бойынша спорт модулінің жылу жүйесі электр энергиясы арқылы жұмыс істеуге бейімделгенімен, нысанның тұрақты әрі тиімді жұмысын қамтамасыз ету үшін орталықтандырылған жылу қазандығын салу жөнінде ұсыныс айтылған.
Облыс әкімі жауапты басқармаларға ғимарат құрылысын аяқтауға қажетті құжаттамаларды әзірлеуді, ал мердігерлерге жұмысты сапалы бітіруді тапсырды. Сондай-ақ, аудан аумағындағы құрылысы ұзаққа созылған нысандардың уақытында қолданысқа берілуін бақылауда ұстайтынын атап өтті.
