Қалалық Мәдениет сарайында қалалық халықтық ардагерлер хорының концерті өтті. Шара ағымдағы жылы аталып өтілетін Қазақ хандығының 550 жылдығы, Абай Құнанбаевтың 170 жылдығы, ҚР Ата Заңы мен Қазақстан халқы Ассамблеясының 20 жылдығы, Жеңістің 70 жылдығы сияқты мерейтойлық даталарға арналған. Концерт барысында, соғыс пен Жеңіс тақырыбындағы әндермен қатар, халық шығармашылығынан музыкалық туындылар орындалды.
{jcomments on}Мәдени шараны ұйымдастырудағы негізгі мақсат – қалың көрермен арасында жекелеген авторлар жазған патриоттық мәндегі музыкалық туындылар мен халық шығармашылығын насихаттау, жас ұрпақты отансүйгіштікке баулу. Он жылдан астам уақыт бойы үздіксіз жұмыс істеп келе жатқан ардагерлер хорының репертуары да бай. Оның ішінде соғыста майдан даласындағы ерлік, Отан қорғау тақырыбындағы мазмұны терең туындылармен қатар, халық әндері де бар.
— Бүгінгідей концерттің ұйымдастырылуы өте үлкен мәнге ие. Біз еліміздің тарихындағы маңызы бар оқиғалардың мерейтойлық даталарын лайықты деңгейде атап өтуге тиіспіз. Әлбетте, бүгінгі шарада көбіне соғыс тақырыбындағы әндер орындалады, алайда біз Қазақ хандығының 550 жылдығы, Абай Құнанбаевтың 170 жылдығы, Ата Заңымыз бен Қазақстан халқы Ассамблеясының 20 жылдығы сияқты мерейлі мезеттерді де назардан тыс қалдырмауға, бұл тақырыптарды да мейлінше қамтуға тырыстық, — дейді ардагерлер қорының мүшелері. Сондай-ақ олар мұндай концерт ұйымдастыруды сұрапыл соғыс жылдарында майдан даласында жау әскеріне қарсы қаймықпай соғысқан жауынгерлердің рухына тағзым етудің, көзі тірі ардагерлер мен сол жылдары тылда аянбай тер төккен тыл еңбеккерлеріне алғыс айту екенін жеткізді.
Концертті тамашалауға келген көрермендер арасында қалалық Ардагерлер кеңесі төрағасының орынбасары Рашида Хасанова да болды. Өз сөзінде ол осындай ерекше кеш ұйымдастырған халықтық ардагерлер хорына алғысын білдірді. Сондай-ақ қалалық Ардагерлер кеңесі төрағасының орынбасары мұндай мәдени шараны өткізудің маңыздылығы жайлы ойымен бөлісті.
— Мерейтойлық даталарды атап өту еліміздің азаматтарының барлығы үшін үлкен мәнге ие. Сондықтан оларды тойлауға ардагерлер хорының үн қосуын заңды деп білемін. Әрі бұл — аталмыш өнер ұжымының халық арасында патриоттық тақырыптағы музыкалық туындыларды насихаттаудағы, жас ұрпақты отансүйгіштікке баулудағы жұмысының көрінісі деп атауға болатындай, — дейді Рашида Ашрафқызы.
Концерт барысында халықтық ардагерлер хоры көрермен алдында сұрапыл соғыс жылдарындағы халықтың, жауынгерлердің көңіл-күйін айқын суреттейтін бояуы қанық әндер мен халық шығармашылығынан алынған туындыларды орындады. Олардың ішінде әйгілі дағыстандық ақын Расул Ғамзатовтың өлеңіне жазылған «Журавли» әні мен тағы да басқа музыкалық шығармалар бар.
Мирас ҚҰСАЙЫН,
«Семей таңы»
