Биыл да кішкентай ауыл үлкен бастамаларға толы. Жылдағы қалыптасқан үрдіске сай, сәуір мен маусым айлары тазалық айлары болып жарияланды. Барлық-Арасан елдімекенінде Қарабұлақ ауылдық округінің әкімі Бауыржан Қаңтарбаевтың тапсырмасы бойынша, мектеп директоры Шолпан Бөлекбаева, фельдшер Бақтыгүл Қуанышбаевалардың басшылығымен сенбілік жұмыстары қызу қарқынмен басталып кетті.
{jcomments on}Аудан әкімі Серік Зайнулдин көктемнің осы мезгілінде әр ауылдық округтерде сенбілік шараларын ұйымдастыруды назарда ұстайтыны белгілі. Бұл ретте ұжымдасқан топ ауыл тұрғындарымен бірлесіп, орталық көшелерге, көп қабатты үйлердің маңайына және жеке сектордағы тұрғын үйлер аумағына тазалық жұмыстарын жүргізіп шықты. Мал қоралары мен арық-тоғандардың басына төгілген қоқыс та аршып алынып, ауыл сыртындағы белгіленген жерге төгілді. Сонымен қоса су құбырлары да тазаланып, қыс бойғы қалдықтар мен күл-қоқыстар сыртқа шығарылды.
Бұталар мен қураған ағаштар кесіліп, жеміс ағаштарының түбі ақталып, абаттандыру-көгалдандыру жұмыстары да басталып кетті. Мекеме басшылары мен ұжымдары, ауыл тұрғындарының береке-бірлігі мен ширақ қимылдауының арқасында біраз шаруа атқарылды. Мұндай жұмыстар алдағы уақытта да жалғасын таба береді.
Сонымен қатар жекеменшіктің қолындағы малға бақташы шығып, ірі қара мен ұсақ мал бағылатын болды. Бұл — ауыл ішіндегі жасыл желектің, абаттандыру бағытындағы жұмыстардың сақталуы үшін де қажетті шара.
Барлық-Арасан шипажайына еліміздің әр түкпірінен келетіндер көп. «Сырт көз — сыншы» деген. Сырттан келген демалушылар жақсы көңіл-күйде болуы үшін, ауылдық округ әкімдігі, мектеп ұжымы, аурухана ұжымдары көше тазалығын бірінші кезекте назарда ұстауда. Суы да, топырағы да шипалы Барлық-Арасан ауылының тазалығы денсаулықтың кепілі деп білеміз.
Ауыл әкімі мен мекеме басшылары сенбілікке атсалысқан барлық тұрғындарға ризашылық білдіріп, алғыс айтады.
Айсажан ОМАРОВА,
Барлық-Арасан ауылы,
Үржар ауданы.
