Екпін ауылындағы белгілі кәсіпкер Болат Қойбағаров ашқан «Балбөбек» балабақшасының жұмысы біршама жақсы жолға қойылған деп айтуға болады. Өткен жылы балабақша ашылғанда, облыс әкімінің өзі келген болатын. Одан кейін балабақша кеңейтіліп, қосымша тағы бір бөлім ашылды. Аудан әкімі Ділдабек Оразбаев жүргізіліп жатқан жұмыстарды көріп, ақыл-кеңестерін айтып кетуге де уақыт табады. Өздеріне жүктелген міндеттердің жеңіл емес екенін жақсы түсінетін мекеме қызметкерлері кәсіби шеберліктерін үнемі жетілдіріп отыруға күш жұмсайды.
{jcomments on}Мысалы, балабақшада бүлдіршіндердің өзіндік белсенділігі мен іскерлік қабілетін, шығармашылық қасиеттерін дамытып, жетілдіріп, қалыптастыру білім берудің мазмұнын толықтырады. Бүлдіршіндерге білім мен тәрбие беруде ұлттық ерекшеліктерді ескере отырып, жаңаша ұйымдастыру педагогтардың шығармашылық ізденістеріне байланысты екені даусыз. Осыған орай менің әрбір әріптесімнің өзіндік ізденісі, жұмыс жоспары бар.
Балабақшаның эстетикалық тәрбие жүйесінде мерекелік ертеңгіліктер мен сауық кештер ерекше орын алады. Мысалы, білім күніне, Тәуелсіздік күніне, жаңа жыл мерекесіне, 8 Наурыз – Халықаралық әйелдер күніне, Наурыз мерекесіне, 1 маусым – балаларды қорғау күніне арналған ертеңгіліктер мен мерекелік шаралар аталып өтіледі. Әрбір өткізілген мерекелік шара балаға түсінікті болып, оларды қуаныш сезіміне бөлеп, көркемдік қабілетін, эмоциялық икемдігін, шығармашылық белсенділігін арттыруы қажет деп түсінеміз. Ертеңгіліктер балаға ерекше шабыт беріп, сезімдерін ұштайды. Орындалатын өлеңдердің, тақпақтардың, билердің мазмұнын, әдеттегі ұйымдастырылған оқу іс-әрекеттерге қарағанда, ерекше түсінеді. Мектепке дейінгі балалардың эстетикалық сезімін тәрбиелейтін ертеңгіліктің, мерекелік салтанаттың балаға тигізер әсері мол. Отан туралы, Тәуелсіздік туралы тақпақ, ән айту барысында олардың жүрегінде өз еліне деген мақтаныш сезімі туады, патриоттық сезімі қалыптаса бастайды. Күлдіргі көріністер мен қызықты ойындар күлкі мен қуаныш сезімін тудырады. Бала өлеңнің әуенін, мәнерлілігін, тақпақтардың әсерлілігін сезінеді, бидегі қимылдың бейнелілігін қабылдай алады.
Биыл жыл басынан бері бірталай мерекелік шаралар ұйымдастырылды. Мерекеде басты орынды музыка өнері алады. Балалардың іс-әрекеті сан алуан. Олар салтанатқа қатысып, концерттік бағдарлама арқылы сахнаға шығады. Салтанатты марш үнімен балалар залға кіреді, өлең айтады, ойнайды және билейді. Әрбір баланы өз қабілетіне сай келетіндей дайындаған орынды. Мерекелік ертеңгіліктер балаға арналған қуаныш екенін тәрбиешілер өзара пікірлескенде жиі айтып отырады. Ол – балалар көпке дейін есінде сақтайтын әсерлердің қайнар көзі, әрі адамгершілік, эстетикалық сезімдерді қалыптастырудың күшті құралы.
Баланың туған жеріне, ана тіліне деген сүйіспеншілігін арттыруда, сөздік қорының, тіл байлығының молаюына, сұлулық пен көркемдікті сезіне білуін және эстетикалық талғамын қалыптастыруда да түрлі жұмыстар жүргізілуде.
Шынар МАЖЕНОВА,
Тарбағатай ауданы.
