Жарма ауданы мектептері және мектепке дейінгі мекемелері мұғалімдері мен тәрбиешілері арасында, Жеңістің 70 жылдығына орай, ХVII спартакиада өткізіліп, баскетбол, волейбол, қол күресі, үстел теннисі, шахмат, тоғызқұмалақ спорт түрлерінен жарысқа ауданның 39 мектебінен 400-ге жуық мұғалімдер қатысып, тартысты бәсекеде бақ сынасты.
{jcomments on}Спорттық шараның салтанатты ашылу рәсімінде аудан әкімі Әнуарбек Мұхтарханов ұстаздар қауымының спорттық жарыстарына сәттілік тіледі.
— Биылғы жыл — еліміз үшін айтулы даталар мен саяси іс-шараларға толы жыл, соның ішінде Қазақ хандығының 550 жылдығы, Қазақстан халқы Ассамблеясының 20 жылдығы, Ұлы Абайдың 170 жылдығы, Жеңістің 70 жылдығы еліміз бойынша кең көлемде тойланады. Бүгінгі спорттық жарыстың салтанатты жиынында осы шараға арнайы шақырылған қонақтар соғыс және тыл ардагерлеріне Жеңістің 70 жылдығы мерекесіне арналған мемлекеттік марапаттауларды тапсырғалы отырмыз. Қазіргі уақытта аудан бойынша 11 соғыс ардагері мен 470-тен астам тыл ардагерлері бар, сіздердің ел үшін сіңірген еңбектеріңіз ұрпақ есінде мәңгіге сақталады, денсаулықтарыңыз мықты болсын, — дей келе, аудан басшысы соғыс ардагері Н.Загидуллинге және бірқатар тыл ардагерлеріне медальдар мен гүл шоқтарын тапсырды.
Спартакиаданың салтанатты рәсімінен соң шара аудан мектептері ұстаздарының спорттық жарыстарына ұласты. Келесі күні де жалғасын тапқан спорттық сайыстардың қорытындысы бойынша волейболдан қыздар арасында ІІІ орынды Маяковский атындағы орта мектебі, ІІ орынды Бірлік орта мектебі еншілесе, І орынды Абай атындағы мектеп- балабақша кешенінің командасы жеңіп алды. Ерлер арасында ІІІ орын К.Шәкенов атындағы орта мектебіне, ІІ орын Ақтайлақ би атындағы орта мектебіне бұйырса, ал бас жүлдені Георгиевка орта мектебі қанжығаға байлады. Баскетбол жарысынан қыздар арасында ІІІ орынға Абай атындағы мектеп-гимназиясы, ІІ орынға Бірлік орта мектебі, І орынға № 236 орта мектеп ие болды. Ұлдар арасында Маяковский атындағы орта мектебі ІІІ орын, К.Шәкенов атындағы орта мектебі ІІ орыннан көрінсе, І орынға Георгиевка орта мектебі қол жеткізді. Ал шахмат жарысынан Жаңғызтөбе орта мектебі ІІІ орынды, Крупская атындағы орта мектебі ІІ орынды, Маяковский атындағы орта мектебі І орынды иеленді. Сол сияқты тоғызқұмалақ жарысынан Абай атындағы мектеп-балабақша кешені және Георгиевка орта мектебі ІІІ орынды өзара бөліссе, Маяковский атындағы орта мектебі ІІ орынға, Ақтайлақ би атындағы орта мектебі І орынға көтерілді. Теннистен Абай атындағы мектеп-балабақша кешені ІІІ орынға тұрақтаса, ІІ орын Көбдіков атындағы орта мектебіне, І орын Карелин атындағы орта мектебінің қанжығасына бұйырды. Қол күрестен қыздар 60-70 келі салмақ дәрежесі бойынша Ә.Шарипов атындағы негізгі мектебінің мұғалімі Н.Оспанова ІІІ орынды қанағат тұтса, Балықтыкөл негізгі мектебінің мұғалімі А.Сибанбаева ІІ орынға, Ақтайлақ би атындағы орта мектебінің мұғалімі Г.Жұмаділова І орынға ие болды. Ал ұлдар арасында 70-80 келі салмақ дәрежесі бойынша Қызылағаш орта мектебінің мұғалімі З.Закировқа ІІІ орын бұйырса, ІІ орынды Жамбыл атындағы орта мектебінің мұғалімі Е.Есімбеков олжалады. І орынды Көшек негізгі мектебінің мұғалімі Б.Надыркулов жеңіп алды. 80-90 келі салмақ дәрежесі бойынша Көшек негізгі мектебінің мұғалімі Болатбекұлы ІІІ орынды, Ш.Уәлиханов атындағы орта мектебінің мұғалімі Д.Бейсенбаев ІІ орынды, Суықбұлақ орта мектебінің мұғалімі Д.Құрманғалиев І орынды жеңіп алды. Командалық жалпы есеп бойынша ІІІ орынды № 236 орта мектебі мен Ақтайлақ би атындағы орта мектебі командалары өзара бөліссе, ІІ орынды Георгиевка орта мектебінің командасы еншіледі. Ал бас жүлдені Маяковский атындағы орта мектебінің командасы қанжығаға байлады. Спартакиаданың жабылу салтанатында аудандық білім бөлімінің басшысы Б.Оразғалиев, Жарма ауданы кәсіподақ комитетінің төрайымы Р.Сәрсенбаева ұстаздар арасында өткізілген спорттық жарыстардың қорытындысын айтып, жеңіске жеткен ұстаздарды мақтау қағаздарымен марапаттады, сондай-ақ естелік сыйлықтар мен жалпыкомандалық есепте жүлдегер атанған командаларға кубок тапсырды.
Кәусар АРЫҚХАНҚЫЗЫ,
Жарма ауданы.
