Жеңістің 70 жылдығы мерекесі қарсаңында Бесқарағай ауданының әкімі Нұрлан Сыдықовтың бастамасымен «Жеңіс керуені» ұйымдастырылған болатын. Аталмыш керуен жуырда алғашқы сапарын Канонерка ауылдық округінен бастап, ауданға қарасты барлық ауылдық округтерді аралап шықты. Акцияға қатысушылардың қатарында аудандық мекемелер мен ұйымдардың, дербес бөлімдердің басшылары, ардагерлер мен белсенді жастар, көркемөнерпаздар ұжымдары болды.
{jcomments on}Акцияның негізгі мақсаты Жеңістің 70 жылдық мерейтойының маңыздылығын, қан майданнан оралған соғыс ардагерлерінің ерліктерін, ұлтжандылық қасиеттерді жастарға үлгі етіп, отансүйгіштік сезімдерін ояту, сондай-ақ жергілікті тұрғындарға әлеуметтік және медициналық көмек көрсету болатын.
Сәуірдің 1-13 күндері аралығында әр ауылдық округте жоғары деңгейде өткізілген іс-шараға ауыл тұрғындары да атсалысты. «Жеңіс керуенін» ауылдық округтер әкімдері бастаған тұрғындар құшақ жая қарсы алып, қонақжайлылық танытты. Осылайша елдімекендердегі мұндай күндер мерекеге айналды.
Жалпы, іс-шараның ойдағыдай өтуіне барлық жағдай жасалыпты. Керуенді мектеп ауласында күтіп алып, ақ жаулықты әжелер шашу шашып, ризашылыққа толы ізгі тілектерін жеткізді. Аудан әкімі Нұрлан Сыдықов акцияға қатысушылар мен ауыл тұрғындарын келе жатқан Жеңіс күнімен құттықтап, әр шаңыраққа шаттық, бақ-береке тіледі.
Акция барысы тағылымға толы болды. Атап айтсақ, «Біз Жеңіске жеттік!» атты дөңгелек үстел ұйымдастырылды. Жиынға жергілікті атқарушы билік өкілдері, соғыс және тыл ардагерлері, этномәдени бірлестіктер мен қоғамдық кеңес өкілдері, ауылдық округ тұрғындары, мектеп оқушылары қатысты.
Басқосуда аға буын өкілдері соғыс жылдары жайлы естеліктерімен бөлісіп, әсіресе жастар үшін қызғылықты әңгімелерін баяндады. Сұрапыл соғыс жылдарында қиындықты ауыр еңбектің арқасында жеңіп, ерте есейіп, өгізбен жер жыртып, бас масақ теріп, таң сәріден қас қарайғанға дейін тыным таппаған сол кездегі балғындарға — бүгінгі күні 80 жасты алқымдаған тыл ардагерлеріне көрсетілер құрмет қашан да айрықша болмақ.
Бір уыс бидайды, бір жапырақ нанды отбасымен бөлісіп, қаптан киім киіп, аядай жерді 4-5 жанұя паналап өскендіктерін айтқан ардагерлер әңгімелерін жас ұрпақ ұйып тыңдады.
Дөңгелек үстелмен қатар, бұл күні кітап және қолөнер көрмелері де ұйымдастырылып, оқушылардан құралған тимуршылар командалары округтегі жалғызбасты қарттарға көмек көрсетті.
Сондай-ақ акция барысында Жеңіске арналған ескерткіш басына гүл шоқтары қойылып, майдан даласында шейіт кеткен боздақтар бір сәт үнсіздікпен еске алынды.
Мұнымен қатар тұрғындарға медициналық және әлеуметтік қызмет көрсету бойынша құрылған мобильді топтар ауылдықтарды жеке сұрақтары бойынша қабылдап, бағыт-бағдар, арнайы кеңес берді.
Шара барысында әр округте түрлі спорттық ойындардан кездесулер өткізілді. Атап айтқанда, шахмат, тенис, волейбол, футбол, тоғызқұмалақтан жарыстар ұйымдастырылып, жеңімпаз командалар мадақталды.
Мерекелік іс-шарада тыл ардагерлері салтанатты түрде «Жеңістің 70 жылдығы» мерейтойлық медальдарымен марапатталды. Ал денсаулықтарына байланысты қатыса алмаған ардагерлердің бірқатарына аудан әкімі Нұрлан Бәтташұлы арнайы үйлеріне барып құттықтап, аға буынның ақ батасын алып қайтты.
«Жеңіс керуені» акциясы Мәдениет үйі өнерпаздары, Бесқарағай ауылдық округі ардагерлерінің, этномәдени бірлестіктері өкілдерінің қатысуымен өткізілген мерекелік концертпен мәресіне жетті.
Әсел ҚАСЫМҒОЖИНА,
«Семей таңы»
