Бүкіл елді сүйсіндірген бұл оқиға жуырда ғана орын алды. Ересек адамдарша әрекет етіп, ерлік жасаған қос жеткіншекке көпшілік сүйсіне қарауда.
Абай орта мектебінің оқушылары, екі дос Ердәулет пен Ардақ балық аулап қайтуды ойлайды.
{jcomments on}Қармақ салуға қолайлы жер іздеп, өзен жағалап келе жатқан сәтте, өзен бетінде бір батып, бір шығып, ағын сумен арпалысып келе жатқан баланы байқайды. Ойланып тұруға уақыт жоқ. Дереу екеуі де ағыны қатты өзенге секіріп, балақайды құтқаруға ұмтылады. Бұл олардың өздері үшін де қауіпті болатын. Абырой болғанда, батып бара жатқан баланы аман-есен жағалауға алып шығыпты.
Ал осы оқиғадан бірер сағат бұрын ҚХР-дан биылғы жылы ғана көшіп келген қандасымыз Әмірегүл Есімхан 6 жасар баласы Ақиқат Ақжолдың жоғалып кеткені туралы аудандық ІІБ-не арыз түсірген болатын. Полиция қызметкерлері шұғыл шешім қабылдап, баланы іздестіру жұмыстарын бастап кеткен екен. Бұл кездері Ердәулет пен Ардақ балақайды анасына табыс ету мақсатында оның үйін өз беттерінше іздеп жүрген еді. Үш бала полиция қызметкерлерінің назарына бірден ілігеді. Сөйтіп жоғалған Ақиқат Ақжол аман-есен ата-анасымен қауышты.
Екі достың бұл ерлігі үржарлықтар арасында аңыз болып тарады. Осы оқиғадан кейін, 14 сәуір күні, Абай орта мектебінде салтанатты жиын болып өтті. Оған аудандық ІІБ бастығы, полиция полковнигі Жеңіс Тұрлыбекұлы Жүрсімбаев, аудандық төтенше жағдайлар бөлімінің аға инженері, өртке қарсы қызметтің подполковнигі Ермек Базаралыұлы Исмаилов, БАҚ өкілдері, Ердәулет пен Ардақтың ата-аналары, ұстаздар мен оқушылар қатысты.
Жеңіс Тұрлыбекұлы мен Ермек Базаралыұлы өз сөздерінде: «Осындай батыр, патриот оқушылардың арамызда жүргені — барлығымыз үшін мақтаныш. Бұл оқушылар батыл қимылдамағанда, бүгін бір отбасы қайғы жамылып қалар еді. Сондықтан да осы балаларға, олардың ата-аналары мен тәрбиелеген ұстаздарына алғыс айту үшін арнайы келіп тұрмыз», — деп ыстық ілтипаттарын білдіріп, алғыс хаттар табыс етті.
Ақжолдың анасы Әмірегүл балаларға, олардың ұстаздарына, іздестіру жұмыстарын жүргізген құқық қорғау органы қызметкерлеріне өзінің аналық ақ тілегін жеткізіп, зор алғысын білдіріп, көзіне жас алды.
Ердәулеттің анасы Алтынай Қалиева (тірек-қозғалыс функцияларының бұзылушылықтары бар балаларды емдеу-сауықтыру мекемесінде қызметкер) мен Ардақтың әкесі Балқыбек Сүлейменов (І.Жансүгіров атындағы орта мектепте технология пәнінің мұғалімі) балаларын марапаттаған құзырлы органдар өкілдеріне ризашылықтарын айтып, аман қалған Ақжолға ұзақ ғұмыр тіледі.
Ал Ердәулет пен Ардаққа: «Мұндай әрекетке қалай бардыңдар?» — деп сұрақ қойған едік. Ердәулет: «Мен баланы аяп кеттім. Жылдамдатып құтқарып қалудан басқа еш ой болмады», — деп жауап қайырды. Сабырлы қалпынан танбайтын Ардақ та осындай ойда болыпты.
Мектептің оқу ісі меңгерушісі Бақыт Кабенқызы Камешова мектеп ұжымы атынан Ердәулет пен Ардаққа ризашылығын білдіріп, оларды мақтан тұтатынын айтты.
Заманында дана бабаларымыз «Елдің атын ақын, батыр, жүйрік шығарады» деген екен. Міне, біздің мектеп жасындағы батыр өрендеріміз мектептің атын ауданға, қала берді елімізге танытып отыр. Бұл — біз үшін мақтаныш.
Апат айтып келмейді. Су тасқынының қаупі Үржар өңірінде әлі де сейілген жоқ. Ал балалардың амандығы барлығымыз үшін қажет. Барлық оқушылар мен ата-аналарға, ұстаздарға абай болыңыздар дегім келеді.
Еркін ҚАДЫРОВ,
Абай орта мектебінің тәрбие ісі жөніндегі меңгерушісі,
Үржар ауданы.
