Тарбағатай ауданы, Тұғыл ауылдық округіне қарасты Байтоғас ауылында тағы бір балабақша мемлекеттік-жекеменшік әріптестік тәсілі негізінде салынып, пайдалануға берілді. Бұл былтырғы жылдан бері аудандағы осы бағдарлама бойынша тұрғызылған он бірінші әлеуметтік нысан екен. Елбасының мектеп жасына дейінгі балалардың барлығын балабақшада тәрбиелеу мақсатына негізделген «Балапан» бағдарламасына байланысты облыс әкімінің тапсырмасын іске асыруда аудан әкімі Ділдабек Оразбаевтан бастап, аудандық білім беру бөлімінің басшысы С.Дауытбаева, ауыл әкімі Б.Әміренова, Ғ.Мүсірепов атындағы орта мектептің директоры Ғ.Наушабаеваның тығыз ынтымақта бірлесе атқарған жұмыстары нәтижелі аяқталып отыр. «Құлыншақ» деп аталған бұл балабақшаны жеке кәсіпкер Нұржан Ермұханбетұлы Қанжекенов өз қаражатымен ашты.
{jcomments on}Болашағынан мол үміт күттіретін, жоғары білімді іскер азамат келешекте осы ауылдан тағы бір 50 орындық балабақша тұрғызуды жоспарлап отырған көрінеді. «Құлыншақ» балабақшасының ашылу салтанатында Тарбағатай ауданының әкімі Ділдабек Оразбаев құттықтау сөз сөйледі. Мектебі жаңадан салынып, жолы жөнделіп, ауылдағы клуб үйі ел игілігіне қызмет етуге қайтарылып, медпункттің жұмысы дұрыс жолға қойылып, көшесі жарықтандырылып отырған Байтоғас ауылынан әлеуметтік маңызы бар жаңа бір нысанның пайдалануға берілуі Елбасының алыстағы ауылдарды көркейту жөніндегі саясатының жүзеге асырыла бастауының дәлелі екенін айтқан аудан басшысы ауыл халқының береке-бірлігінің мықты болуы, еңбек жетістіктері өз алдына, ауылда бала туу көрсеткішінің жылдан-жылға артып, қазірдің өзінде 75 сәбидің балабақша кезегінде тұруы жақсылықтың нышаны екенін атап көрсетті.
Салтанатты сәтте сондай-ақ кәсіпкер Нұржан Қанжекенов, Майнұр Мұхатова, Мұрат Тастанбеков, Мәрзия Ақбаева құттықтау сөз сөйледі. Ахан Бибаев ақсақал батасын беріп, Гүлжиян Какенова әже лента қиды. Ауылдың ажарлана түскені, «еңбегіне қарай дәулеті» дегендей, халықтың тұрмыс дәрежесінің жақсара бастағаны, шағын кәсіпкерлік дамып, Тұрсынғали Тоқтағұловтың мешіт тұрғызғаны, Мәрия Асаубаеваның тойхана салғызғаны, Ерлан Уатхановтың машина жөндеу орталығын құрғаны, клуб үйін жөндеуге қаржы қарастырылып отырғаны да осы жиында қуанышты хабар, жақсы жаңалықтар ретінде айтылды. Ауыл азаматы Мұрат Тастанбеков өз сөзінде орталықтан шалғай ауылдағы осындай игілікті істердің бәрі де аудан басшысының көңіл бөлуінің нәтижесі екенін, Ділдабек Тәжібайұлының Байтоғасқа алты рет келгенін, әр келген сайын тың бастама айтылып, бір жаңалық ала келетінін мысалға келтірді.
Хамза СӘТИЕВ,
«Семей таңы»
