Елорда төрінен наурыздың 23 жұлдызында аймақтарды аралауға аттанған «Менің Қазақстаным» үгіт-насихат пойызы Шығыс Қазақстан облысына жасаған алғашқы сапарында ең алдымен Аягөз қаласына аялдады. Патриоттық акция қатысушыларын күтіп алу салтанатына қала тұрғындары көп жиналды. Жиналған көпшілік алдында аудан әкімі Бақытжан Байахметов жалынды сөз сөйлеп, делегация мүшелеріне алғысын білдірді.
{jcomments on}- Биыл қазақстандықтар үшін ерекше жыл. Ұлт Көшбасшысы Н.Назарбаев «Нұрлы жол — болашаққа бастар жол» атты халыққа арнаған Жолдауында: «Ассамблея құрылуының 20 жылдығын атап өту арқылы біз қазақстандықтардың рухани күш-қуатын арттыруымыз және толеранттылығын еселеуіміз керек», — деген болатын. Біз тағдыры ортақ, бірлігі жарасқан біртұтас елміз. Біздің қазақстандық жол — бейбітшілік, келісім және даму жолы! 20 жылдық аясында кең — байтақ Қазақстанды аралап, сапарға шыққан «Менің Қазақстаным» пойызы еліміздегі ұлтаралық татулық пен бейбітшілікті көрсететін маңызды шаралардың ұйытқысына айналып, міне, бүгін біздің ауданымыз Аягөзге ат басын тіреп отырсыздар. Жұмыстарыңызға табыс тілеймін! — деді аудан басшысы көпшілік алдындағы өз сөзінде.
«Менің Қазақстаным» пойызының әлеуметтік жобасы аясындағы интеллектуалдық бағыттағы жұмыстары осылайша Аягөз ауданында да өз жалғасын тапты. Атап айтсақ, ҚР Парламенті Мәжілісінің депутаттары Үсенгелді Медеуов пен Ахмед Мурадовтың қабылдауында азаматтардың жеке өтініштері бойынша жұмыс жүргізілгеннен кейін, «Бейбітшілік пен қоғамдық келісімнің Қазақстандық үлгісі» деген тақырыпта патриоттық бағыттағы дәріс ұйымдастырылды. Осыдан соң «Сыйластық. Түсіністік. Келісім» атты толеранттылық құндылықтарды қалыптастыруға бағытталған семинар-тренинг ұйымдастырылды. Бұл семинар-тренинг ҚР Президенті жанындағы «Қоғамдық келісім» мемлекеттік мекемесінің қызмет басшысы Нұрбек Шаяхметовтің модераторлығымен өтті. Аталмыш лекцияға ҚР Парламенті Мәжілісінің депутаттары Ү.Медеуов, А.Мурадов, Астана қалалық қырғыз этномәдени бірлестігінің жетекшісі Ш.Исмаилов қатысып, өз ойларын ортаға салды. Бұл шараға Аягөз ауданы әкімдігінің басшылары, мемлекеттік қызметтегі мамандар, мұғалімдер мен жастар қатысты.
Шара соңында аудандық орталық кітапханаға «Теңдессіз сыйлық» акциясы аясында мемлекеттік этносаясатқа арналған кітаптар табыс етілді. Мұнымен қатар аудан әкімі атынан ҚР-ның халық әртісі, Мемлекеттік сыйлықтың лауреаты Ескендір Хасанғалиевқа, ҚР-ның еңбек сіңірген қайраткері, әнші Толқын Забироваға «Аягөз ауданының құрметті азаматы» атағы берілді.
Осылайша, «Менің Қазақстаным» пойызының мүшелері Аягөз ауданындағы жұмысын жақсы нәтижелермен қорытындылады. Жалпы, бұл күні қоғамдық келісім кеңесінің қабылдауына 20 адам келсе, 715 адам дәрігерлік кеңес алыпты. Ал әлеуметтік сала бойынша 15, халыққа қызмет көрсету мәселесі бойынша 7, кәсіпкерлік және ауыл шаруашылығы бойынша 62 адам қабылдауда болып, өздеріне тиісті көмек-кеңестерін ала алды. Сондай-ақ ҚР Әділет министрлігі қызметкерлерінің қабылдауында 27 адам болған екен. Мемлекеттік қызметкерлер арасында өткен лекция, семинар-тренинг, іскерлік ойындарға 150, жастармен өткен кездесуге 150, ал кітапхана қызметкерлерімен өткен семинар-тренингке 40 адам қатысып, акцияның мәнін ашатын өзекті деген бірқатар сұрақтар талқыланды.
Ал кешкі мезгілде Аягөз қаласының орталық алаңында эстрада жұлдыздарының қатысуымен гала-концерт өтіп, отаншылдық тақырыбындағы әндер шырқалған мәдени шараны жалпы саны 13 мыңға жуық адам тамашалапты.
Қуан ӘЛІМБЕК,
Аягөз ауданы.
