Жуырда аудан әкімі Алмас Оңдақановтың бастамасымен Зайсан ауданы бойынша елдімекендерді абаттандыру, көркейтіп-көгалдандыру және тазалық жұмыстарын жүргізу мақсатында арнайы екі айлық жарияланды. Аудан әкімдігінің мәжіліс залында өткізілген жиынды аудан әкімі Алмас Аманқолұлы өзі ашып, күн тәртібіндегі мәселеге байланысты қала және ауылдық округ әкімдері мен кәсіпорын, мекеме басшыларының, аудан тұрғындарының алдында тұрған міндеттерге тоқталды.
{jcomments on}Абаттандыру және көктемгі сенбіліктер тақырыбын арқау еткен аталмыш жиынға қала және ауылдық округ әкімдері, мекемелер мен кәсіпорындар басшылары, жеке кәсіпкерлер, мәслихат депутаттары қатысты.
Басқосуда аудандық сәулет, құрылыс, тұрғын үй-коммуналдық шаруашылығы, жолаушы көлігі және автомобиль жолдары бөлімінің басшысы А.Өтебаев ақпараттық хабарлама жасап, Зайсан қаласы мен ауданға қарасты ауылдар бойынша таяу аралықта жүзеге асырылуы тиісті жұмыстар қатарына тоқталып өтті. Бүгінде күн тақырыбында аудан орталығында және тірек ауылдар мен шағын елдімекендерде сенбілік жұмысын белсенді жүргізіп, көгалдандыру жұмыстарына басымдық беру ісі тұр. Бұл ретте ұйымдастырушылық жұмыстарға да басымдық берілуі тиіс.
Жиында қатысушылар өз ой-пікірлерін айтып, ұсыныстарын да жеткізді. Жалпы, тазалық айлығына байланысты жұмыстар бүгінде қызу қарқынмен басталып кетті. Атап айтсақ, өткен аптада аудан бойынша сенбілік жүргізу шаралары ұйымдастырылды. Оған аудан жұртшылығы, еңбек ұжымдары, денсаулық, білім, мәдениет саласының мамандары, әсіресе мектеп оқушылары ұйымшылдықпен қатысты.
Әрбір еңбек ұжымы, сондай-ақ жеке сектордағы тұрғындар да белсенділік таныта білді. Қаладағы саябақтар мен гүлзарлар, көп қабатты тұрғын үйлер маңайы қоқыстардан тазаланып, ретке келтірілді. Сонымен қатар таяу аралықта түрлі ағаш көшеттерін отырғызуға арналған орындар дайындалды. Сондай-ақ қаланың көрнекті жерлерінен жаңадан гүлзарлар өсірілуі тиіс. Бұл бағытта да жұмыстар жүргізіліп жатыр.
Аудан әкімі Алмас Оңдақанов қаланың орталық көшелерін және ауылдық округтерді аралап, тазалық айлығы барысында атқарылып жатқан жұмыстарға назар аударды.
Сенбілік барысындағы шаралар алдағы уақытта да айрықша назарда болмақ.
А. НҰРТАС,
Зайсан ауданы.
