Отандық өнімді қолдау өңірлердегі кәсіпкерлік салаға да кең өріс ашатыны белгілі. Бұл ретте Семей қаласындағы ұлттық кәсіпкерлер палатасы филиалының ұйытқы болуымен бірқатар іргелі шаралар қолға алынуда. Мәселен, жуырда қаламыздағы Жастар сарайында өңір кәсіпкерлерінің өнімдері қойылған ерекше көрме өтті.
{jcomments on}Аталмыш шараға, негізінен, жеңіл өнеркәсіп саласына маманданған шағын және орта кәсіп саласының өкілдері қатысты. Семейлік кәсіпкерлер көрмеге өз шаһарымызда өндірілген азық-түлік пен қатар, киім-кешектер сынды күнделікті қажеттіліктегі бұйымдарды әкеліпті. Мәселен, «Коndiz» ЖШС кондитер фабрикасы «Крекерден» бастап, шоколадты печенье өнімдерін, «Прииртыш бройлер кұс фабрикасы» тауық етінің мұздатыл-ған бірнеше түрлерін, ал «Ажар» ЖШС кулинариялық тәттілерін әкеліпті.
Сондай-ақ көрмеге қойылған жергілікті Семей ет комбинатының тауар ассортименті де біршама бай екен. Ысталған, жартылай қақталған шұжық өнімдерімен бірге бұқтырылған сиыр және қой еттерінің консервілері көрмеден орын тапқан. Бұл орайда, бір айта кетерлігі, халықаралық «халал» сертификатына ие қалбырдағы тағамдық өнімдер де тұтынушыға жол тарта бастапты.
Көрмеге сонымен қатар тігін цехтарының тоқыма өнімдері бұйымдары да шығарылыпты. Әсіресе отандық өнім өндіруде соны жетістіктерге жетіп жүрген «СемСпецСнаб» ЖШС-нің ҚР Күштік құрылымдарына арналған қызметтік киімдері келушілер назарына ұсынылды. Бүгінде кәсіпорын тауар айналымын арттыру мақсатында өнімнің әртүрлілігіне кең көңіл бөлуде. Мысалы, оқушылардың мектеп формалары да дәл осы күні сөреден орын тауыпты. Ал Семей аяқкиім фабрикасы өндіріске жаңадан енгізуді жоспарлап отырған түркиялық үлгідегі тауар түрлерін әкелген.
Бір бұл ғана емес, «Омаровтар» ательесінің сән әлемінен лайықты орын алып үлгерген үлгілері де жұртшылықтың сүйсінісін туғызды. Ал қаламыздағы «Sun Studio» ЖШС баспа тауарларынан арнайы көрме әзірлепті. Заманауи полиграфия өнімдері де бүгінде қалалықтар сұранысына кеңінен ие.
Көрменің соңында Кәсіпкерлер палатасының Семейдегі филиалының ұйымдастыруымен қаладағы шағын және орта бизнес өкілдерінің басын құраған алқалы жиын болып өтті. Сөз алған филиал директоры Ардақ Әділжанов бүгінгі таңдағы отандық өнімді қолдау шараларының тімділігі, кәсіпкерлікке ден қойғысы келетін отандастарымызға көрсетілер тегін көмек түрлері жөнінде кеңінен түсіндіріп өтті. Ал өз кезегінде сөз алған облыстық мәслихаттың депутаты, белгілі кәсіпкер Марат Құрманбаев Елбасы белгілеген 5 институттық реформаның екеуі кәсіпкерлік саланы да қамтитынын айтып өтіп, отандық бизнесті қолдаудың игіліктері жайлы да пікір білдірді.
Жалпы, бұл жиынға 50-ден аса кәсіпкер қатысқан болатын. Басқосуда сонымен қатар қазақстандық өнімге деген сұранысты арттыру үшін сауда орындарына тек отандық тауарларды шығарып, әріптестік қолдау көрсету жайлы да бірқатар тиімді ұсыныстар айтылып, ой-пікірлер ортаға салынды.
Қуаныш ЖОЛЫМБЕТ,
«Семей таңы»
