Салауатты өмір салтын ұстанып, дені сау ұрпақ тәрбиелеу үшін әр адамның спортты жанына серік еткені абзал. Бұл тұрғыда шаһарда спорт нысандары көптеп салынып, Семейдегі спорт саласының серпін алып келе жатқанын айта кету керек. Қалада жаттығу залдары да аз емес. Солардың бірі — «GOLD KING» спорт клубы. Өткен жұма күні қала әкімі Айбек Кәрімов «GOLD KING» спорт клубына арнайы барып, мекеменің жұмысымен танысты.
{jcomments on}Дальняя ауданында орналасқан «GOLD KING» спорт клубы 2009 жылы жұмысын бастаған. Осы уақыт ішінде спорт мекемесі толайым табыстарға қол жеткізіп үлгеріпті. Жеке кәсіпкер Андрей Алтайбаев басшылық ететін спорт залдарында биылдан бастап мүмкіндігі шектеулі азаматтар да тегін жаттығуға мүмкіндік алып отыр. Қазіргі таңда 30-дан астам қамкөңіл жан мұнда тұрақты түрде жаттығу жасайды. Көз жанарынан айырылған І топтағы мүгедек Серікбек Айсаулиннің спорт залына келіп, жаттығу жасап жүргеніне екі жыл болған.
— Өмірден әсте үміт үзген емеспін. Жаттығу жасағалы өзімді жақсы сезінемін. Аптасына екі күн жаттығамын. Ол үшін мұнда барлық жағдай жасалған. Бапкеріміз Андрей Викторович те — өз мамандығының нағыз шебері. Бізді әрдайым жақсы көңіл-күймен қарсы алып, әрқайсымызға арнайы уақытын бөліп отырады. Спортпен айналысқан кезде мүмкіндігіміздің шектеулі екенін ұмытып та кетеміз, — дейді Серікбек Айсаулин.
Жеке кәсіпкердің қаражатымен ашылған аталмыш спорт клубында жаттығушылар үшін барлық жағдай жасал-ған. Мысалы, жаттығу залдары, қажетті заманауи құрылғылар, киім ауыстыратын және жуынатын бөлмелер, демалатын орындар қарастырылған. Екі қабатты ғимараттың бірінші қабатында ерлер жаттықса, екінші қабат әйелдерге арналған. Жалпы, пауэрлифтинг спорты соңғы жылдары елімізде кеңінен таныла бастаған. Аталмыш спорт түрінің Семейге келгеніне аса көп уақыт болмаса да, ниет білдірушілердің саны аз емес көрінеді. Спортшылардың жеткен жетістіктері де ауыз толтырып айтарлықтай екен. Андрей Алтайбаевтың айтуынша, өткен жыл спорт клубы үшін табысты болған. Мәселен, бір жылда аталмыш спорт клубынан 16 спорт шебері мен 27 спорт шеберлігіне үміткер шыққан. Спортшылар Қазақстан құрамасына ілініп, түрлі дәрежедегі жарыстарға қатысып қайтқан. Қалалық дене шынықтыру және спорт бөлімінің басшысы Мұрат Құржықаев пен спорт клубының қожайыны Андрей Алтайбаев қала басшысын спорт клубының жұмыстарымен ғимараттың ішін аралата жүріп таныстырып шықты. Андрей Алтайбаев қала басшысына алдағы жоспарлары жайлы да айтып өтті.
— Қазіргі уақытта мұнда 500-ге жуық спортшы жаттығу жасайды. Оның 100-ден астамы әйел адамдар болса, 30-дан астамы — мүмкіндігі шектеулі жандар. Жарыстарға да жиі қатысып, жетістіктерге де жетіп жүргендері аз емес. Алдағы уақытта, жаттығу залдарына қосымша, үлкен жарыстар өткізетін зал салуды жоспарлап отырмыз, — дейді А.Алтайбаев.
Жаттығу залдарын аралап, спортшылармен дидарласқан қала әкімі Айбек Кәрімов «GOLD KING» спорт клубының жұмысын жоғары бағалады.
Айта кету керек, сенбілік жұмыстары барысында «GOLD KING» спорт клубында жаттығатын спортшылар Толстой көшесінің бойына тазалық жұмыстарын көше тұрғындарының көмегінсіз өздері жүргізген екен.
Нұрдәулет КӘКІШЕВ,
«Семей таңы»
