Ел қорғау жолындағы ерлік һәм осынау жылдардағы тылдағы еңбектің ерен үлгісі қашан да үлкен мәртебеге лайық. Бүгінде соғыс және еңбек ардагерлеріне көрсетілер құрмет те осыны айғақтайды. Бұл игілікті үрдістен семейліктер де шет қалмауда. Жуырда қалалық әкімдікте қала әкімі Айбек Кәрімовтің қатысуымен ардагерлер қауымына «Жеңіске 70 жыл» мерекелік медалін тапсыру салтанаты болып өтті.
{jcomments on}Кешегі ел басына төнген нәубетті жанымен сезінген, майдан даласында кеудесін оққа төсеген, ауыр жүкке арқа тосқан есіл ерлер — бүгінгі ардагерлер — арамызда күн өткен сайын сиреп келеді. Алғы сөзін осындай ойлармен өрген шаһар басшысы Айбек Мүталапханұлы салтанатты шараны құттықтау тілегімен ашты.
— Біз бүгінде кешегі сұрапыл соғыс ардагерлері мен тылда еңбек еткен жандарды айрықша қадір тұтамыз. Олар өз уақыттарында барлық ауыртпашылықты қайыспай көтере білді. Олардың еліміздің бүгіні үшін сіңірген еңбектерін әрдайым есте тұтып, өткерген өмірлерін қазіргі жас ұрпаққа үлгі-өнеге етеміз. Сіздерге әрдайым тағзым зор, — деп атап өтті өз сөзінде Айбек Кәрімов.
Осыдан соң басқосуға келген соғыс ардагерлері Петр Коломин, Габдулгазиз Ахмеров, Кәмкетай Байыров сынды қарт майдангерлерге алғашқы болып мерекелік медаль салтанатты түрде табыс етілді. Сондай-ақ аталмыш шараға, бұл жандардан бөлек, 12 тылдағы еңбек ардагерлері де қатысты. Жастық шақтағы жігерлерін Жеңіске үлес қосу жолында ауыр еңбекке арнаған, өмірлері аңызға бергісіз қариялардың өңіріне де қала әкімі «Жеңіске 70 жыл» медалін тақты.
Айта кету керек, бұл шара — алда келе жатқан 9 мамыр мейрамымен құттықтаудың тек бастамасы ғана. Өздерінің балалық шағы мен жасөспірім кезеңін соғыстың ауыр күндеріне арнаған жандарға әлі де мерекелік медальдар табыс етілетін болады.
Ардагерлермен болған алқалы басқосу барысында қала басшысы жуырдағы Елбасының Семейге жасаған сапары жайлы, сондай-ақ қаламыздың әлеуметтік-экономикалық тұрғыдағы даму қарқыны жайлы да қысқаша есеп беріп өтті. Сонымен қатар мерекелік медаль иегерлері атанған ардагерлер қауымына да кезекпен сөз беріліп, еліміздегі өркенді істер, қаламыздағы ел игілігі үшін атқарылып жатқан шаралар қатары айтылды. Шаһар ақсақалдары жай-күйлерін әрдайым назарда ұстап, ақыл-кеңестеріне жүгініп отыратын қала әкіміне ризашылықтарын білдірді. Сондай-ақ сол бір ауыр күндердің қамықтырар естеліктері жайлы да сөз қозғады.
— Майдангерлердің кешегі ерліктері баға жеткісіз. Бүгінде біз Мәскеуден Берлинге дейінгі аралықты жүріп өткен барлық солдаттардың жеңісті жолын, ұрыс даласынан аман оралғандардың кейінгі бейбіт өмірдегі еңбектегі зор жетістіктерін мақтанышпен айтамыз, әрдайым жадымызда тұтамыз. Соғыстан есеңгіреген елдің еңсесін тіктеуде сол майдангерлердің де, тыл ардагерлерінің де үлесі қомақты. Біз соғыс жылдарының балаларымыз, көргеніміз тек ауыртпашылық қана болды. Шөп шаптық, масақ тердік, ересектер атқаратын ауыр еңбекке иық тостық. Егістіктегі жұмыстарға байланысты оқу жылы қазан айында басталатын еді. «Бәрі де майдан үшін!» деген ұран суықтан тоңған біздің жанымызды жылытатын. Біз Жеңісті жақындатуға осылайша үлес қостық, — деді сол бір күндер жайлы өз естелігінде тыл ардагері Нәсен Сембаев.
Ыстық ілтипат, жылы лебіз, ауыр кезеңдер жайлы жарқын естеліктерге толы салтанатты жиынның соңы концерттік бағдарламаға ұласты.
Қуаныш ЖОЛЫМБЕТ,
«Семей таңы»
