Семей қаласында «Жеңістің 70 жылдығы» мерекелік медалін табыстау жалғасуда. Майдан даласында Жеңіс үшін жан аямай шайқасқан ардагерлермен бірге, тыл еңбеккерлеріне де құрмет көрсетілді.
{jcomments on}Өңіріне мерекелік медаль таққандардың бірі — тыл еңбеккері Зайнезаип Шукшумбаева. Кейуана биыл 95 жасқа толған. Алайда қария, осы жасқа келгеніне қарамастан, тың көрінеді. Сұрапыл соғыс басталып, бала күнінен талай қиындықты көрген Зайнезаип әжей еңбектің арқасында аурухананың есігін де ашпаған.
— Мен өмірі ауырған кісі емеспін, ауруханаға да жатып көрмеппін. Соғыс жылдары балалар үйінде жұмыс істедім. Колхоздың жұмысына да араластым. Талай қиын жағдайлар бастан өтті ғой. Өгізбен шөп те таситынбыз. Өзімізде жоқ болса да, барымызды майданға жіберіп отырдық. Бір күнде қаншама адам майданға аттанады. Енді соғыс болмасын. Сендер оны көрмеңдер, — деп көзіне жас алды қарт әжей.
Қария шөпшегінің неменесі дүниеге келіп, оның да қуанышын көріп отыр. Ұрпағының осы күнге жетіп отырғаны- бейбітшілік пен тұрақтылықтың елімізде ту тіккені дейді.
«Бәрі де майдан үшін, бәрі де жеңіс үшін!» ұранымен тылда еселі еңбек еткен жандардың қатарында Владимир Щербаков та бар. Биыл 80 жасты алқымдайтын тыл еңбеккері, әкесі соғысқа аттанғанда, 7 жаста ғана болған. Бұл күн қария есінен ешқашан сөнбек емес.
— Сұм соғыс басталғанда әкемді алып кеткенін ешқашан ұмытпаймын. Анамыз екеуіміз қимастықпен шығарып салған едік. Ал 1943 жылы қаңтар айында әкеміздің із — түзсіз жоғалғаны туралы қағаз алдық. Сол жылы мектепке бардым. Оқып жүріп жұмыс жасайтын едік. Сондықтан осы бейбіт өмірді, оны сыйлаған ардагерлердің ерлігін ешқашан ұмытпауымыз керек, — дейді тыл еңбеккері.
Сондай-ақ қалалық тілдерді оқыту орталығы атынан мекеме директоры Олжас Соғымбаев Шайдолла Диқанбаев ақсақал шаңырағына барып мерекелік медальды табыс етті.
— Біз сұрапыл соғыс кезінде, ат ауыздығымен су ішкен, ер етігімен су кешкен уақытта, майдан даласында ерлік көрсеткен батырлармен қатар, тылда тер төккен қарияларымызға қарыздармыз. Сіздер ешқандай ауыртпашылыққа қарамастан, аянбай еңбек еттіңіздер, сол арқылы Жеңіске үлестеріңізді қостыңыздар. Семей қаласы әкімдігі атынан мерекемен арнайы құттықтай келдік, — деп атап өтті О. Соғымбай.
Өз кезегінде Шайдолла ақсақал соғыс ардагерлері мен тыл еңбеккерлеріне әрқашан көңіл бөліп, қамқорлық көрсетіп келе жатқан жергілікті атқарушы билік өкілдеріне ризашылығын білдіріп, бейбітшіліктің мәңгілік сақталуын, келешек ұрпақтың соғыстың ауыртпашылығын көрмеуін тілеп, ақ батасын берді.
Асан МЫРЗАХАНОВ,
“Семей таңы”
