Абай облысында 2024–2029 жылдарға арналған тұжырымдаманы іске асыру бойынша жоспар бекітілген. Онда 44 іс-шара қарастырылған. Соның 32-сі «Таза Қазақстан» экологиялық акциясы аясында жүзеге асырылады. Бұл туралы Өңірлік коммуникациялар қызметінде Табиғи ресурстар және табиғат пайдалануды реттеу басқармасының басшысы Марат Теміржанов мәлімдеді.
Жылдың бірінші тоқсанында бірқатар жұмыс атқарылды. Білім беру ұйымдарында экологиялық тақырыпта эссе байқаулары өтті, мектептерде сынып сағаттары ұйымдастырылды. 5–6 сынып оқушылары арасында «ProEko» жобалар байқауы өтіп, 38 жоба ұсынылды, оның 17-сі жүлделі орынға ие болды. Сонымен қатар облыс бойынша 28 экологиялық мәдени іс-шара өткізілді.
– Облыс әкімінің өкімімен 3 сәуір мен 31 мамыр аралығында санитарлық-экологиялық екі айлық жарияланды. Осы кезеңде сенбіліктер ұйымдастырылып, арнайы техника тартылды. Нәтижесінде 12 218 аула, 97 саябақ, 57 ескерткіш аумағы тазартылып, 2897 тонна қалдық шығарылды, – деді басқарма басшысы.
Сонымен қатар су айдындары мен арықтар тазартылып, көгалдандыру жұмыстары жалғасып жатыр. Биыл 67 мың ағаш отырғызу жоспарланған, қазіргі таңда 431 көшет егілді.
– Экологиялық құқық бұзушылықтардың алдын алу бағытында да жұмыс күшейтілді. ҚР ӘҚБтК-нің 505-бабы бойынша 4171 әкімшілік хаттама толтырылып, 9,1 млн теңге көлемінде айыппұл салынды. Алдағы уақытта сенбіліктерді тұрақты өткізу, аумақтарды таза ұстау және санитарлық талаптарды сақтау бойынша жұмыс жалғасады, – деді Марат Теміржанов.
