Semeytany.kz – Семей қаласында бой көтеретін жаңа әкімшілік-іскерлік орталық аумағында алғашқы құрылыс нысандарының жұмысы басталды.
Облыс әкімі Берік Уәли құрылыс алаңдарын аралап, жобаның барысымен танысты. Орталықтың макетін аймақ басшысына облыс әкімінің бірінші орынбасары Ербол Садыр таныстырды.
Жобаға сәйкес, қаланың оң жағалауында аумағы 1000 гектар болатын жаңа әкімшілік-іскерлік орталық салынады. Мұнда тұрғын үй қоры 3 миллион шаршы метрден асады. Ал әкімшілік және коммерциялық нысандар көлемі 1,2 миллион шаршы метрге жетеді. Жоба толық іске асқанда орталықта 75 мыңнан астам адам тұрады деп жоспарланған.
Сонымен қатар, бұл аумақта мәдениет, білім, денсаулық сақтау және спорт нысандары, қонақ үйлер мен бизнес орталықтар, қоғамдық кеңістіктерді қамтитын 40-тан астам нысан салу көзделген.
Аймақ басшысы «Абайға құрмет» республикалық акциясы аясында салынып жатқан бірқатар нысандардың құрылысымен де танысты. Атап айтқанда, Маңғыстау облысы қолға алған Достық үйі мен Шымкент қаласы салып жатқан Шығармашылық орталығының құрылысы қаралды.
Өз сөзінде Берік Уәли бұл жобаның қала үшін маңызы зор екенін атап өтті. Оның айтуынша, Қасым-Жомарт Тоқаев бастамасымен жүзеге асып жатқан құрылыс жұмыстары жаңа жұмыс орындарын ашып, жергілікті тұрғындардың әл-ауқатын арттыруға ықпал етеді.
Қазіргі таңда «Абайға құрмет» акциясы аясында еліміздің әр өңірі Семейде түрлі нысандар салуды қолға алған. Мәселен, Солтүстік Қазақстан облысы Мемлекеттік рәміздер алаңын тұрғызса, Түркістан облысы Көрме орталығын, Ақтөбе облысы Жекпе-жек сарайын, Павлодар облысы Үстел теннисі орталығын салуда. Сонымен қатар, Атырау облысы «Абай әлемі» ғимаратын, Қызылорда облысы «Анаға тағзым» орталығын, Қостанай облысы Рухани орталықты тұрғызады. Жетісу облысы қалаға кіреберіс қақпа салса, Астана қаласы 1200 орындық мектеп, Алматы қаласы Медиа орталық құрылысын қолға алған. Ал Шығыс Қазақстан облысы Ертіс жағалауын абаттандыру жұмыстарын жүргізеді.
Жалпы, жаңа әкімшілік-іскерлік орталық Семейдің келбетін жаңартып, өңірдің әлеуметтік-экономикалық дамуына серпін беретін ірі жобалардың бірі ретінде бағалануда.
