Жеңістің 70 жылдық мерекесі Үржар өңірінде кең көлемде аталып өтті. Салтанатты шарада ең алдымен соғыстан қайтпай қалған солдаттарды бір минут үнсіздікпен еске алды. Осыдан соң Жеңісті жақындатуға атсалысқан ардагерлер мен тыл еңбеккерлеріне арналған патриоттық әндер мен театрландырылған көріністерге кезек берілді.
{jcomments on}Иә, бұл мереке Үржар ауданында жыл басынан бері атап өтіліп келе жатыр. Осыған дейін де түрлі акциялармен толыққан мейрам осылайша мамырдың 9 күні өзінің шырқау шегіне жетті. Орталық стадионға үржарлықтар мей-лінше көп жиналды. Мерекенің салтанатты ашылу рәсімін аудан әкімі Серік Зайнулдин алғы сөзбен ашты.
— Жеңіс күні тек соғыс ардагерлерінің ғана емес, барша қазақстандықтардың айрықша мерекесі. Бұл сұрапыл соғыста жанқиярлықпен ерлік жасаған, елі үшін жанын құрбан еткен бабалар рухына тағзым етудің, қиян-кескі ұрыстан аман келген ата-әжелерді құрметтеудің нағыз үлгісі көрсетілетін күн. Биыл да Жеңістің 70 жылдығы мерекесі еліміздің түкпір-түкпірінде ерекше сән-салтанатпен аталып өтуде. Бүгінде еліміз дамудың жаңа белесіне көтеріліп, дүниежүзінің ең дамыған 30 елінің қатарына ену жолында. Еліміздің қол жеткізген жетістіктері Елбасы саясатының, қоғамдағы тұрақтылықтың, бейбітшіліктің, ынтымақтастықтың арқасында екендігі шындық. Елімізде ұлтаралық және конфессияаралық келісімнің тиімді моделі қалыптасты. Қазақстан моделінің ықпалдылығы әлемдік қауымдастықта танылып, киелі қазақ мекені бейбітшіліктің тоғысқан жеріне айналды, — деді аудан басшысы Серік Зинабекұлы.
Аудан әкімі, сондай-ақ сұрапыл жылдарда Қазақстаннан бір жарым миллионға жуық адам майданға шақырылып, олардың әрбір екіншісі ұрыс даласынан оралмағандығын айта келіп, есімдері аңызға айналған үржарлық Кеңес Одағының Батырлары Владимир Колесников, Федор Озмитель сынды басқа да даңқты ардагерлер есімі бүгінгі ұрпаққа үлгі-өнеге екендігін тілге тиек етті. Сөзінің соңында Серік Зинабекұлы арамыздағы ардагерлерге майдан даласындағы ерліктері мен тылдағы еңбектері үшін зор алғыс айтып, ел іргесі аман болып, ел даңқының арта беруін тіледі.
Соңынан 2086 Мақаншы әскери бөлімінің командирі Арман Рамазанов пен аудандық ардагерлер кеңесінің төрағасы Нұрланбек Сандыбаев ардагерлер қауымын, жиналған жұртшылықты құттықтап өтті.
Осыдан соң салтанатты шара бастау алды. Жаяу жүгіріс марафонына қатысушылар сап түзеп, алаңға келіп, «Жеңіс алауы» жағылды. Осылайша, әскери бөлім сарбаздары мен мектеп оқушылары сап түзеп, мерекелік шеруді бастап кетті.
Соңынан соғыстың әр кезеңін бейнелейтін театрландырылған көріністер көрсетіліп, әскери автомашиналар шеруі ұйымдастырылды. Шекара жасағының әскерилері тұрғындарға арнап әскери ойындар көрсетті.
Шара «Ұлы Жеңіске тағзым» атты салтанатты кешпен жалғасын тауып, соңынан аудан әкімінің қатысуымен өткен «дала асханасы» атты мерекелік шарамен жалғасты.
Бауыржан ЖАҚЫП,
«Семей таңы»
