Көктем келісімен, Семейде тазалыққа көңіл бөлініп, тынымсыз тіршілік басталып кетті. Шаһарда сәуір—мамыр айларында санитарлық тазалық, көркейту—көгалдандыру жұмыстарын жүргізу мақсатында екі айлық тазалық акциясы жарияланды.
«Тазалық – денсаулық кепілі» деп халқымыз бекер айтпаған. Белсенді басталған жұмыстар барысында жалпыхалықтық сенбіліктер өткізіліп, қала келбетін көріктендіруге күш салынуда. Аталмыш акцияның аяқталуына да аз ғана уақыт қалды. Осыған орай қалалық ішкі саясат бөлімінің басшысы Айдар Садырбаев бастаған топ қаланың бірқатар аумақтарында болып, тазалық жұмыстары жүргізілмеген жерлерді тексерді.
{jcomments on}Әлбетте, қала тұрғындарының басым бөлігі жүргізіліп жатқан тазалық айлығына үлкен қолдау білдірді. Әр саналы азамат өзі тұратын қаланың көрікті болуы үшін үлес қосты. Жергілікті биліктің тазалыққа мән беріп, оны халық болып жалғастырып, қолға алғаны, әрине, сүйсінерлік жайт. Әсіресе қаланы көгалдандыруға көп көңіл бөлініп, бар күш салынуда.
— Жалпы, өмір сүріп отырған ортамыздың, қаламыздың таза, әдемі болғанына не жетсін?! Оны жасау, оған үлес қосу – әрбір азаматтың міндеті. Осы атқарылып жатқан игі істі кейбірі түсінсе, қайсыбірі түсіне қоймайды, — деген қалалық ішкі саясат бөлімінің басшысы Айдар Садырбаев барша тұрғындарды тазалыққа баса назар аударып, өз үлестерін қосса екен деген тілегін білдірді.
Жұмыс тобы алдымен қаланың сол жағалауындағы Глинка көшесінен бастап, аталмыш аудандағы бірқатар көп қабатты тұрғын үйлерде тазалық жүргізілмегеніне көз жеткізді. Мәселен, Глинка көшесіндегі 35-үйдің ауласында сенбілік жұмыстары мүлде жүргізілмеген екен. Көп қабатты тұрғын үйдің маңы түрлі тұрмыс қалдықтары мен құрылыс материалдарына толы.
— Мамыр айы да аяқталып келе жатыр. Белгілі бір қорытындылар жасалатын кез келді. Жалпы, сенбіліктерге қала тұрғындары, әсіресе мектеп оқушылары мен студенттер, бюджеттік саланың қызметкерлері белсенді қатысты. Бұл жерде қаланың ірілі-ұсақты кәсіпорындарының белсенділігі біраз төмендеу. Кейбір жеке секторларда да солай. Әрқайсысы өз ауласын тазартуға тырысады. Дегенмен жекелей бір аумақтарда жұмыстар жүргізілмегенін байқап қаламыз. Бүгінгі акциямыздың мақсаты-тазалық шараларына мейлінше тұрғындардың назарын аударту. Себебі біз таза, көрікті қалада тұрғымыз келсе, әрқайсысымыз өз септігімізді тигізіп, жұмыс істеуіміз керек, — деді қалалық ішкі саясат бөлімінің басшысы Айдар Садырбаев.
Қала тазалығы, оның көркейіп-көгалдануы – барлық тұрғынға ортақ міндет. Сондықтан әрбір тұрғын өзі тұрған көшесіне тазалық жұмыстарын жүргізсе, дер кезінде күл-қоқыстан тазартып, ағаш отырғызса, шаһарымыздың ажарланып, көркейе түсуіне қосқан үлес болар еді.
Асан МЫРЗАХАНОВ, «Семей таңы»
