Шаһар тазалығы алдыңғы кезекте қоғамдық тәртіпке де байланысты. Бұл ретте қала тұрғындарына да, құқық қорғау органдары қызметкерлеріне де өзіндік жауапкершілік жүктеледі. Жуырда облыстық Абай кітапханасында қоғамдық тәртіпті қамтамасыз ету, жүргізілген тазалық шараларының нәтижелілігін сақтау мақсатында қала әкімі Айбек Кәрімовтің қатысуымен арнайы кеңес болып өтті. Жиынға Семей қалалық мәслихатының хатшысы Бейсенбек Ақжалов, жол полициясы қызметкерлері мен учаскелік полиция инспекторлары, қоғамдық бірлестік өкілдері, ПИК басшылары қатысты.
Кеңес отырысында алғы сөз алған Айбек Мүталапханұлы қоғамдағы тәртіпсіздікке мүлдем төзбеушілік қағидатын ұстану қажеттілігін атап өтіп, қоғамдық тәртіптің бұзылуына тікелей әсер ететін бірнеше факторларды атап көрсетті. Оның ішінде әсіресе бүгінгі шаһарымыз үшін өзекті болып тұрған қала тазалығы мәселесі алдыңғы орында тұр. Рас, гүлзарлар мен жасыл желекке, қоғамдық орындардағы мемлекет мүлігіне нұқсан келтіру сынды өрескел бұзақылық фактілері тіркелмегенімен, тазалық сақтауда кейбір тұрғындар мәдениетінің жоғары болмауы күнделікті тұр-мыста байқалып жүр. Яғни, сана тазармай – аулалар да тазармайды деген сөз.
— Қаланың санитарлық тазалығы, көгалдандыру мәселесі жөнінде сіздермен пікірлесудің маңыздылығы зор. Бұл шараны алдағы уақытта да тұрақты өткізу көзделуде. Сенбілік өткізілісімен, қала тап — таза қалыпқа келеді. Алайда көп ұзамай-ақ қайтадан жинастыруға тура келеді. Демек бұл мәселе дұрыс қозғалған жоқ деген сөз. Қала тазалығы тек жергілікті биліктің ғана жұмысы емес. Бұл — бұқаралық шара. Оның ішінде тұрғындардың да жауапкершілігі жоғары. Сондай-ақ тәртіп сақшыларының да өз міндеттемелері бар, — деп атап өткен қала әкімі аталмыш мәселені тереңірек талқылауды ұсынды.
{jcomments on}Осыдан соң қалалық ішкі саясат бөлімінің басшысы Айдар Садырбаев шаһарды гүлдендіру, санитарлық тазалық сақтау жөніндегі идеологиялық концепция тезистерімен таныстырды. Семей қаласындағы санитарлық-эстетикалық мәдениетті арттыру мақсатында әзірленген арнайы жоба 5 пункттен, концептуалды негізден, жүзеге асыру кезеңдерінен тұрады екен.
Аталмыш концепция нөлдік төзбеушілік принциптері негіздерінде әзірленіпті. Басты үш бағытта жұмыс істеу көзделген. Атап айтсақ, рухани-мәдени бағыттағы тәрбие мен санитарлық-эстетикалық тәрбие және ақпараттық-ағартушылық бағыттан тұратын жоба мазмұны өте ауқымды. Осы үш тақырып аясында, әсіресе қаладағы мәдениет және білім беру ошақтарымен қатар, БАҚ жұмысына да айтарлықтай жауапкершілік жүктеледі. Көзделген міндет қалалықтардың қоғамдық орындарда тазалық сақтаудағы мәдениетін арттырып, ішкі тұрақтылықты нығайтып, шаһардың эстетикалық келбетін жақсарта түсу болып отыр. Концепция негіздері осылайша қала патриоттарының санын арттырып, өмір сүру дағдысына елеулі өзгеріс әкелуі тиіс.
Аталмыш жиын барысында қорытынды сөз алған қала әкімі осы кезеңге дейінгі атқарылған іс-шаралар жайлы айта келе, Семейдің рухани-мәдени маңыздылығын сақтап, арттыру бағытында барша құқық қорғау саласы өкілдерін бірлесіп жұмыс істеуге шақырды. Сонымен қатар бұл шараны осыдан кейінгі кездерде де өткізіп, қажетті жағдайда түрлі мамандар мен ардагерлердің ақыл-кеңестеріне жүгіну керектігін жеткізді.
Әр семейлік өзінің азаматтық ұстанымын айқын байқатып, өз ауласына, қала көшелеріне жанашырлықпен һәм жауапкершілікпен қарауы ләзім.
Кеңесте қозғалған мәселелер төңірегінде тиімді жұмыстар атқарылуы керектігі жайлы тұжырым жасалынып, қорытындыланды.
Қуаныш ЖОЛЫМБЕТ, «Семей таңы»
