Халықаралық балаларды қорғау күніне орай, 20 мамыр — 20 маусым аралығында «Қазақстан балалары – Нұрлы жолмен!» атты республикалық акция өтуде. Негізгі мақсат – қоғам назарын балалардың құқықтарын қорғау мәселелеріне аудару және оларға бөлінетін ықыласты арттыру. Осы орайда, 1 маусым — Балаларды қорғау күні аясында қалалық білім бөлімінің ұйымдастыруымен Семей шаһарында бірқатар шаралар ұйымдастырылды.
Бұл күнгі балалар мерекесінің беташары Орталық саябақта басталды. Салтанатты іс-шараның ашылу рәсімінде қала әкімінің орынбасары Надежда Шарова сөз алды. Барша балақайға ашық аспан, бақытты балалық шақ тілеген Надежда Васильевна қала әкімі Айбек Кәрімовтің құттықтауын жеткізді.
{jcomments on}Осыдан соң Балалар мен жастардың шығармашылық сарайы өнерпаздарының ұйымдастыруымен мерекелік концерт басталып кетті. Бүлдіршіндер шырқаған ән мен көркем би бұл күнгі мереке шырайын әрлей түскен еді. Ал осы сәттерде Орталық саябақтың әр бұрышында балаларға арналған түрлі ойын алаңдары жұмысын бастаған еді. Атап айтсақ, осындай алаңдардың бірінде бүлдіршіндер «Все лучшее — детям» атты асфальтқа сурет салу байқауына қатысса, келесі алаңда «Қазақстанның балалары спортты таңдайды!» ұранымен жарыстар өтіп жатты. Бұл жерде балақайлар дойбыдан, шахматтан және тоғыз-құмалақтан өзара сайысқа түсті.
Осы күнгі салтанатты шаралар әсіресе қаламыздағы балалар үйінде ерекше әсермен өтті. Мұндай орындардағы мерекелік ертеңгіліктерге қаламыздағы белді мекемелер демеушілік жасапты. Мәселен, «Қазақстанның тұрғын үй құрылыс жинақ банкі» АҚ-ның Семей филиалы қалалық № 3 балалар үйіндегі тәрбиеленушілерді арнайы келіп құттықтады. Атап айтсақ, банк қызметкерлері балаларға базарлық ретінде, үстелдері мен орындықтарын қоса алғанда, 21 компьютерден тұратын үлкен компьютер сыныбын жаңартып, жабдықтапты. Сонымен қатар оқыту бағдарламаларын да орнатыпты. Ал бұл көмек әр баланың жеке тұлға ретінде қалыптасуына игі ықпалын тигізері анық. Ал балалар үйінің тәрбиеленушілері өз кезектерінде демеушілері мен өзге де тәрбиеленушілерге арнап концерттік бағдарлама қойды. Өнерлі бүлдіршіндер көп екен. Ән мен биді кезекпен орындап, көпшіліктің ықыласына бөленді.
— Біз жыл сайын 1 маусым – Балаларды қорғау күніне орай мерекелік шаралар ұйымдастырамыз. Бұл республикалық деңгейде қолға алынуда. Дегенмен балалар үйінде биыл алғаш рет өткізіп отырмыз. Компьютерлік сыныпты жаңартып бердік. Бұдан бөлек филиал қызметкерлері өз қалтасынан қаражат шығарып, Семей қаласындағы № 8 балалар үйінің тәрбиеленушілеріне демеушілік көмек жасады. Банкте ашылған жинақтау шотына 100 мың теңге салдық. Бұл балалардың ертеңі жарқын болуы үшін жасалынып жат-қан бірегей шара деп білеміз, — дейді пікір білдірген «Қазақстанның тұрғын үй құрылыс жинақ банкі» АҚ-ның Семей филиалы директорының орынбасары Еркежан Әлібекқызы.
Бұл күні балақайлар көңілін аулаған шаралар қатары бір осылармен ғана шектелген жоқ. Түстен кейін шаһардың Орталық алаңында «Тек қана жұлдыздар» атты республикалық, халықаралық, облыстық және қалалық балалар мен жасөспірімдер арасындағы байқаулардың лауреат- тарын ұлықтаудың салтанатты шарасы ұйымдастырылды.
Расында, Семейде өнерпаз өрендердің қатары мол екеніне аталмыш жиын барысында айқын көз жеткіздік. Мәселен, «Звездочки» тобы, «Россы» және «Үркер» студияларының өрендері мен қалалық «Әнші балапан», «Ақ көгершін» байқауларының жеңімпаздарын атасақ болады. Дәл осы күні республикалық «Жас таланттар — 2015» байқауы мен қалалық «Бақытты балалық шақ — 2015» сайысының жүлдегерлерінің мерейлері тасыды. Жас дарындар есімдеріне тоқталар болсақ, біраз жерге баруға болады.
Қорыта айтсақ, 1 маусым мерекесі өңіріміздегі барша балғынды ерекше қуанышқа бөледі.
Қуаныш ЖОЛЫМБЕТ, «Семей таңы»
