Бүгінде еліміздің барлық аймағында «Нұр Отан» партиясының қоғамдық қабылдау бөлмелерінде мемлекеттік органдар басшылары мен барлық деңгейдегі әкімдер, құқық қорғау органдарының басшылары, депутаттар азаматтарды жеке сұрақтары бойынша жүйелі түрде қабылдау өткізіп келеді.
Жақында қаламыздағы жеке және заңды тұлғалардың мәселелерін қарастырып, оларды шешуге көмек көрсету мақсатында «Нұр Отан» партиясы Семей қалалық филиалының қоғамдық қабылдау бөлімінде Зейнетақы төлеу жөніндегі мемлекеттік орталығының Семей қалалық бөлімшесінің басшысы Ляйля Сабырова азаматтарды зейнетақы мәселесіне қатысты сұрақтары бойынша қабылдау жүргізді.
{jcomments on}Келіп түскен өтініштердің дені қоғамдық маңызы бар мәселелер. Мысалы, Василий Мазур қырық жыл еңбек өтілі бола тұра, аз зейнетақы алатынын айтты. Еңбек жолын Ресейде бастаған ол Қазақстанға тек 1956 жылы көшіп келген. Зейнетақының аз төлденуі де осыдан. Өйткені қарияның еңбек өтілін дәлелдейтін ешбір құжаты жоқ екен. Бұл сауалға жауап берген Зейнетақы төлеу жөніндегі мемлекеттік орталығының Семей қалалық бөлімшесінің басшысы Ляйля Сабырова мұндай жағдайда қалада арнайы құрылған комиссияға жүгіну керектігін, ондағылар еңбек өтілін дәлелдейтін қажетті құжаттарға өздері сұраныс жіберсе, жағдайды реттеуге болатынын атап өтті.
Жалпы, қоғамдық қабылдауға 11 адам жазылып, өздерін толғандырған сауалдарына нақтылы жауаптар алды. Тұрғындарды зейнетақы жүйесіндегі өзгерістер, қолданыстағы зейнетақымен қамсыздандыру заңнамасының талаптары, зейнетақы төлемін тағайындау барысында жалпы еңбек өтілін ескермеу, біртұтас зейнетақы жинақтау қорына қатысты бірқатар мәселелер төңірегінде сауалдар жолданды. Аталмыш сұрақтарға орталық басшысы заң аясында жауап беріп, азаматтардың өтініш-ұсыныстары бақылауға алынатынын атап өтті.
— «Нұр Отан» партиясы қоғамдық қабылдау жұмысы бүгінде тұрғындарды толғандырып жүрген мәселелерді анықтап, оларды оңтайлы шешу жолдарын қарастыруда жоғары маңызға ие. Сондықтан осындай қоғамдық қабылдау кезінде көтерілген мәселелердің барлығы жауапсыз қалмай, жақын арада шешімін табады, – деді қабылдау соңында Зейнетақы төлеу жөніндегі мемлекеттік орталығының Семей қалалық бөлімшесінің басшысы Ляйля Сабырқызы.
Асан МЫРЗАХАНОВ,
«Семей таңы»
