Кеңеске облыстық басқармалар мен өңірлік департаменттердің басшылары қатысты. Аудан және қала әкімдері жиынға бейнережим арқылы қосылды. Күн тәртібіндегі мәселелер бойынша облыстық кәсіпкерлік және индустриялық-инновациялық даму басқармасының басшысы Айбек Рахымбеков пен облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбек баяндама жасады.
Облыста сауда нысандарының сыртқы келбетін жақсарту, маңдайшаларын жаңарту және іргелес аумақтарды абаттандыру жұмыстары жүргізіліп жатыр. Биыл 9 маусым мен 9 шілде аралығында өңірдің 10 ауданы мен Курчатов қаласындағы сауда нысандарына мониторинг жасалды.
Тексеру барысында нысан иелеріне ғимараттардың қасбеттерін жөндеу, маңдайшаларды жаңарту, ескірген жарнамаларды алып тастау және аумақтарды абаттандыру бойынша ескертулер берілді.
Ақсуат, Үржар және Көкпекті аудандарында тиісті жұмыстар толық аяқталған. Бұл елді мекендерде сауда нысандарының қасбеттері мен маңдайшалары жаңартылып, айналасы тазартылып, ретке келтірілген. Ал қалған аудан-қалаларда жұмыстарды жандандыру қажет.
Осыған байланысты Берік Уәли кәсіпкерлік басқармасына және аудан-қала әкімдеріне 1 желтоқсанға дейін анықталған кемшіліктерді толық жоюды, жөндеу және абаттандыру жұмыстарын аяқтауды тапсырды.
Аймақ басшысы сауда нысандарының сыртқы келбеті мен айналасының тазалығы елді мекендердің жалпы көрінісіне тікелей әсер ететінін атап өтті. Сондай-ақ кейбір өңірлерде бұрын берілген тапсырмалардың толық орындалмағанын айтып, кәсіпкерлермен түсіндіру жұмыстарын күшейту қажеттігін жеткізді.
«Сауда нысандарының сыртқы келбеті талапқа сай болуы, іргелес аумақтардың тазалығы және абаттандырылуы елді мекендердің келбетіне тікелей әсер етеді. Сондықтан бұл бағыттағы жұмыстарға формалды түрде қарауға болмайды», – деді Берік Уәли.
Кеңесте әлеуметтік төлемдерді тағайындау тәртібіндегі өзгерістер де қаралды. 2027 жылғы 1 қаңтардан бастап елімізде әлеуметтік төлемдерді тағайындау тәсілі өзгереді. Қазіргі уақытта облыста жаңа тәртіпті түсіндіру жұмыстары жүргізіліп жатыр.
Облыс әкімі әлеуметтік қолдау реформасының негізгі ережелерін тұрғындарға кеңінен түсіндіруді және ақпараттық жұмысты күшейтуді тапсырды.
