Еуропада каталондық «Барселона» командасы Чемпиондар Лигасын ұтып алып, тойлап жатқанда, семейлік “Спартак” командасы да жанкүйерлерін жерге қаратпады. ҚР бірінші лигалар арасындағы кезекті кездесуінде өскемендік “Востокты” қабылдаған семейлік “Спартак” 2 : 0 есебімен жеңіске жеті. Жасыл алаңда жасындай жарқылдаған Матвей Матвиенко мен Константин Задорожный.
Кездесу бірінші минуттан –ақ қарқынмен басталды. Семейліктер қарсыластардың айып алаңында қауіпті сәттер туғызғанымен, есеп ашу мүмкіндігі болмады. Бірінші таймда қос команда қанша тырысқанымен, таблодағы көрсеткіш еш өзгеріссіз қалды.
{jcomments on}Екінші таймда “Спартак” командасы сәтті шабуылдар ұйымдастыра отырып, 54-минутта Матвей Матвиенко “Востоктың” қақпасынан саңылау тапты. Есеп 1: 0. Стадионға жиналған жеті мың жанкүйер бір желпінді. Қалайда есепті теңестіруге тырысқан “Восток” командасының шабуылдары нәтижесіз аяқталып жатты. Қорғанысқа табандап жатып алған біздің жігіттер Өскемен командасына еш мүмкіндік бермеді. Ал 82- минутта “Спартак” шабуылшысы Константин Задорожный екінші голдың авторы атанды. Жасыл алаңдағы шығысқазақстандық қос команда арасынды тоқсан минуттық теке тірес 2:0 есебімен “Спартактың” пайдасына шешілді.
Матч соңында бас бапкерлердің қатысуымен БАҚ өкілдеріне арналып баспасөз мәслихаты ұйымдастырылды. Бапкерлер жасыл алаңдағы ойын өрнегіне өз көзқарастарын білдірді.
— Өте тартысты кездесу болды деуге негіз бар. Дегенмен алаң иелерінің мерейі үстем болды. Олардың жеңіске деген ынтасы айқын сезілді. Біздің ойыншыларда да мүмкіндіктер болғанымен, олар мүлт кетті. Оңтайлы сәттерді уысынан шығарып алды. Қазір команда қалыптасу үстінде деуге болады. Жергілікті аяқдоп шеберлерін тәрбиелеуді қолға алдық. Біз ұсынған 25 адамның 15 ойыншысы өскемендік футбол мектебінің тәрбиеленушілері. Қателіктерімізді түзеп, жұмысты жалғастырамыз,- деп атап өтті «Восток» ФК-ның бас бапкері Павел Евтеев.
Өз кезегінде «Спартак» командасының бас бапкері Алексей Петрушин «Восток» командасының ойындағы тегеурінділігін жоғары бағалап өтті.
— Жан алысып, жан беріскен кездесулердің бірі болды десем, артық айтпаспын. Себебі қос команда да бір өңірдің намысын қорғауда. Әрқайсысының жоғарғы лигада өнер көрсетуге үміті бар. Оған екеуі де лайықты. “Востоктың” ойыншыларын жақсы білемін. Сауатты ойын жүргізе отырып, қорғаныста мығым болды. Мұқалмас жігерлерінің арқасында соңғы минутқа дейін күрескеніне тәнті болдым. Олардың бірнеше кездесулерде жеңіліп бара жатып, қарсыластарынан жеңісті суырып алған сәттері қаншама рет болғанын жақсы білесіздер. Біз өзіміз көздеген жоспарды іске асыра алдық. Жігіттерге көп рақмет. Әр ойынды қалдырмайтын жанкүйерлерге шексіз ризашылығымды білдіремін. Мұндай зор қолдау білдіріп жатқанда жеңілу мүмкін емес, — дейді «Спартак» ФК-ның бас бапкері Алексей Петрушин.
Кезекті жеңісіне қол жеткізген семейлік команда 22 ұпаймен 1 лиганың турнирлік кестесінде көш бастап келеді. Жақсылық МҰРАТҚАЛИ, «Семей таңы»
