Семей қаласы тұрғындары мен қонақтарының серуендеп демалатын орындарының бірі Ертіс өзені жағалауында бүгінде абаттандыру жұмыстары жүргізілуде. Сонау Кеңес заманынан жөндеу көрмеген жағалаудың семейліктер үшін алатын орны ерекше. Көп ұзамай бұл аумақ жаңа кейіпке еніп, ел игілі—гіне берілмек.
Жоба бойынша қайта жаңғыртудың алғашқы кезеңін ағымдағы жылдың шілде айының соңына дейін аяқтау жоспарлануда. Оның аясында жаяу жүргіншілер жолы толықтай жасалып, қоршаулар ауыстырылмақ. Сонымен қатар гүлзарлар мен каскадты бұрқақ қайта қалпына келтіріледі. Бүгінгі күні бұл аумақта «Гордорстрой» ЖШС мердігер мекемесінің жұмысшылары ескі жолды сүріп тастап, жаңа төсеніш салуға дайындауда. Сондай-ақ өзенге төмен түсетін сатыларды қалыпқа келтіруде. Бұл жұмыстардың барлығына 20 адамнан тұратын екі жұмыс тобы тартылмақ. Күрделі жөндеуден өтетін демалыс аумағында орындықтар да ауыстырылып, декоративтік шамдар орнату жоспарда бар. Бұл жұмыстар да жөндеудің алғашқы кезеңінде атқарылмақ.
{jcomments on}Жобаның бірінші кезеңіне әзірге бюджеттен 72 миллион теңге бөлінген. Ал жағалауды алдағы уақытта абаттандыра түсу үшін, қосымша тағы 100 — 150 миллион теңге қажет болатын көрінеді. Қазір қалған жұмыстарды атқару мақсатында жобалық — сметалық құжаттар әзірлену үстінде. Ал Ертіс жағалауындағы жұмыстар толықтай 2016 жылы аяқталып, шаһарымыздың көрікті жерлерінің біріне айналмақ. Бір сөзбен айтқанда, жаңа кейіпке енетін аумақта ұзындығы екі жарым шақырымдық жүгіретін жол мен веложол, балалар алаңқайы, жаттығу жабдықтары, жаңа көше шамдары, орындықтар мен биоәжетханалар орнатылмақ.
Қазір жағалаудағы жұмыс қарқын алған. Жөндеу жұмыстарының сапасын көру, жұмыс үлгерімін білу мақсатында сейсенбі күні қала әкімі Айбек Кәрімов жағалауға арнайы келді.
— Ертіс жағалауы халықтың көп келетін, әсіресе жастардың, қала қонақтарының көптеп жиналатын орындарының бірі. Сондықтан да бұл жер соған сай әдемі болуы керек. Күрделі жөндеу жұмыстарының нәтижесінде бұл жер демалушылардың көңіл-күйлерін көтеретіндей болғаны абзал. Аумақ кеңес заманы кезінде, осыдан 40 жыл бұрын жасалған. Барлығы ескірді. Оның үстіне қазіргі адамдардың талғамы басқа, — деген шаһар басшысы жұмыстар барысында дизайнерлік шешімге, қоршаулар, бордюрлер мен жол төсеніштері түстерінің сәйкес келуіне, ою-өрнектердің шеберлікпен жасалып, талғаммен орындалғанына аса мән беруді тапсырды. Қала басшысы сондай-ақ мердігердің пайдаланылатын құрылыс материалдарының сапалы болуын қадап айтты.
Мердігер демекші, аталмыш нысанда, негізінен, жергілікті өнімдер пайдаланылмақ. Бұл туралы қаламыздың тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Александр Генрих атап өтті.
– Мысалы, қоршаулар «Гордорстрой» ЖШС-нің металл соғатын цехында дайындалған. Бұл жерде біз тек бордюрлерді Шу қаласынан жеткіздік. Өйткені олар граниттен жасалған және ұзақ уақыт пайдалануға болады, — дейді бөлім басшысы.
Қала әкімінің айтуынша, бүгінде қаланы абаттандыру жұмыстарына үлкен көңіл бөлініп келеді. Мәселен, жақын уақытта Абай көшесі мен Шәкәрім даңғылы қиылысындағы көлік байланысының жобасы дайындалмақ. Бұдан өзге Орталық алаң аумағындағы жаяу жүргіншілердің жер үсті өткелі құрылысы аяқталып, пайдалануға берілуі күтілуде.
Асан МЫРЗАХАНОВ, «Семей таңы»
