Бала шақтан болашаққа — бір қадам. Балалықтың бал дәуренін артқа тастап, көңілді қимастық пен қуаныш кернеген, аңсау мен арман сезімдері араласқан, жүректері алып ұшқан шәкірттер алтын ұя мектептерімен қош айтысып, қолдарына аттестаттарын алды. Жүректері алып ұшқан олардың әрқайсысы үшін бүгін азаматтық қадамның алғашқы баспалдағы басталды. Алда әлі алар асу, шығар белестер бар. Сондықтан оларға деген бүгінгі сенім, үлкен өмірдің даңғыл жолын жарық етпек.
Сенбі, 20 маусым күні Семей қаласының Орталық алаңында да биыл мектеп бітірген түлектер қолдарына аттестаттарын алды. Шараға арнайы қатысқан шаһар басшысы Ермак Сәлімов мектеп бітірушілерді арнайы құттықтады.
Семей қаласы бойынша биыл 1724 оқушы қолына аттестат алды. Оның ішінде 10 бала «Алтын белгі» иегері атанса, 16 түлек үздік аттестатқа қол жеткізді. Халықаралық олимпиадаларда сынға түскен 23 оқушының арасынан 13 оқушы жүлделі орындардан көрініп, жоғары оқу орындарының гранттарын иеленген екен.
{jcomments off}Салтанатты кеш түлектердің тілек ағашына арман ленталарын байлау рәсімімен басталды. Театрландырылған көрініс мектеп бітірушілер мен ата — аналардың мерекелік көңіл – күйіне ерекше әсер қалдырды. Салтанатты кеште қала әкімі Ермак Сәлімов түлектерге сәт сапар тілеп, ақ тілегін арнады.
— Құрметті түлектер! Сіздер өмірлеріңіздегі ең маңызды құжаттардың бірі аттестатқа ие болдыңыздар. Бұл сіздер үшін үлкен өмірге алған жолдама іспетті. Мемлекет басшысы үнемі жастарға сенім артып келеді. «Нұрлы жол» бағдарламасын іске асыруда жасампаздыққа ұмтылған жастар бір жағадан бас, бір жеңнен қол шығарып, бірлесіп күш салуы тиіс. Себебі дәл сіздерге 2015 жылғы мектеп бітірушілерге Мемлекет басшысының Ұлт Жоспары — «100 нақты қадам» стратегиясын жүзеге асыруға мүмкіндік беріліп отыр. Ол үшін, әрине сіздерден терең білім, тәжірибе мен қажырлы еңбек талап етіледі. Ұлттың көсегесін көгертуді көздеген жоспар елімізді жаңа деңгейге көтеретіні сөзсіз. Сондықтан сіздерден үлкен жетістіктерді күтеміз. Бұл орайда барлықтарыңыз білім алып, табжылмай тәжірибе жинақтауға тырысуларыңыз керек. Сол сәтте «Нұрлы болашақ» ұлттық жобасының орындалуына жол ашылатын болмақ, — деп атап өтті Ермак Сәлімов.
Ермак Бидахметұлы мектепті үздік тәмамдаған түлектерге «Алтын белгі» төсбелгілерін, үздік аттестат табыс етті. Жылдағы дәстүр бойынша мектеп ұясынан шыққан шәкірттер вальс билеп, соңғы қоңырау үні сыңғырлады. Үлкен өмірге қадам басып, қолына аттестат алған түлектердің бірі — Аида Ережепова.
— Биыл мектеп бітіп жатқан барлық түлектерге сәт сапар тілеймін. Көздеген жоғары оқу орындарына түсуге қол жеткізер деген сенімдемін. Біз үшін жауапты сәттер әлі алда, — дейді жас түлек.
Салтанатты кеш концертпен жалғасын тапты. Сонымен қатар түлектердің есімдері жазылған шарлар аспанға әуелеп, мерекелік отшашу ұйымдастырылды.
Жақсылық МҰРАТҚАЛИ, «Семей таңы»
