Семей қаласының әкімі Ермак Сәлімов шаһардағы әлеуметтік және өндірістік нысандардың жұмысымен танысуда. Дүйсенбі күні түске дейін бірқатар әлеуметтік нысандарды аралаған қала басшысы тәуліктің екінші жартысында «Силикат» зауыты мен «Қазақстан—Салют» кәсіпорнында болды.
{jcomments on}«Силикат» ЖШС – қаламыздағы құрылыс материалдарын шығаратын ірі кәсіпорындардың бірі. Силикат кірпішін өндіруден республика бойынша алдыңғы қатардағы зауыт жылына 100 миллионнан астам кірпіш өндіруге қауқарлы. Мұнда түрлі пішіндегі құрылыс блоктарын да шығарады. Әктас материалдарын өндіру де жолға қойылған. Айта кету керек, Шығыс Қазақстан облысындағы өндірістік, азаматтық, мәдени-әлеуметтік нысандарды салуда осы зауыттың өнімдері пайдаланылған. Қазіргі уақытта да аталмыш құрылыс материалдарын аймақтағы бірқатар түсті металлургия және алтын өндіруші компаниялар қолдануда. «Силикат» ЖШС-нің бас директоры Борис Адианов қала әкімі Ермак Сәлімовті кірпіш өндіру технологиясымен, цех бөлімдерімен, зауыттың жалпы жұмысымен таныстыра жүріп, кәсіпорынның мәселелерінен де хабардар етті. «Силикат» зауытының жұмысшыларын алаңдататыны өнімді сату мәселесі екен. Кәсіпорын басшысының айтуынша, 2008 жылы мұнда 120 млн. кірпіш шығарылса, ағымдағы жылдың 5 айында 15 млн. ғана өнім өндірілген. Бұл өткен жылмен салыстырғанда 30%-ға кем екенін айтады зауыт басшысы. Еңбек ұжымымен кездесу барысында қала басшысы кәсіпорын мәселесін шешуге қатысты өз ойын білдірді.
— Барлығын бүгіннен бастап қолға алу керек. Алдымен, ел бойынша өнімді сату мәселесін жолға қойып, келісімшартқа отыратын кәсіпорындарды табу қажет. Олар сіздердің өнімдеріңізді құрылысты жобалаған кезде ескеруі тиіс. Бұл – басты мәселе. Жалпы, мәселенің түйінін тарқатуда сіздердің ұсыныстарыңызды тыңдауға әрдайым әзірміз, — деді Е.Сәлімов.
Бұдан кейін қала басшысы бастаған жұмыс тобы түрлі пиротехникалық шоу ұйымдастырумен және робототехникалық қондырғылар ойластырып шығарумен айналысатын «Қазақстан-Салют» кәсіпорнына ат басын бұрды. Еліміз бойынша анимациялық мүсіндерді құрастыратын бірегей кәсіпорында жасалған кинг-конг, қолтырауын, динозавр сынды және басқа да мүсіндер Астана қаласындағы «Думан» ойын-сауық кешенінде мыңдаған тамашалаушылардың көз қуанышына айналғанын айта кету ләзім. Қазіргі уақытта аталмыш кәсіпорын мамандары, Астана күніне орай, елордалықтар мен бас қала меймандарының мерекелік көңіл-күйлерін көтеруге септігін тигізетін үлкен отшашулық бағдарлама әзірлеп жатқан көрінеді.
Өндіріс цехтарын аралап, серіктестік ұжымымен кездескен қала әкімі Ермак Сәлімов кәсіпорын жұмысына сәттілік пен табыс тіледі.
Жақсылық МҰРАТҚАЛИ, «Семей таңы»
