Шілде айынан бастап Семей қаласының тұрғындары пайдаланған суға жаңа тариф бойынша төлем жасайтын болады.
ҚР Ұлттық экономика министрлігі табиғи монополияларды реттеу және бәсекелестікті қорғау комитетінің ШҚО бойынша департаменті 2015 жылғы 26 наурыздағы жарлығымен «Семей Водоканал» МКК- ның сумен қамтамасыз ету және суды бұру қызметтерінің жаңа тарифтерін бекітті. Аталған сұранысты кәсіпорын өткен жылдың қазан айында ұсынған.
«Семей Водоканал» МКК жоспарлы-экономика бөлімінің бастығы Жанат Мылтықбаеваның айтуынша, жаңа тариф ағымдағы жылдың 1 маусым айынан бастап өз күшіне енді. Осыған сәйкес жеке тұлғаларды сумен қамтамасыз ету қызметі 100 %, яғни бір текше метрі 22,48 теңгеден 44,96 теңгеге (ҚҚС есепке алғанда- 50,36) қымбаттады. Суды бұру қызметі де (кәріз жүйесінде) өз кезегінде бір текше метрі 19,50 теңгеден 39 теңгеге дейін көтерілді (ҚҚС есепке алғанда — 43,68 теңге).
Жылу энергиясы өндірісімен айналысатын және ыстық сумен қамтамасыз ететін кәсіпорындарында («Теплокоммунэнерго» МКК) тариф өзгеріссіз қалды, ал заңды тұлғаларға судың бір текше метрі 105,16 теңгеден 140,32 теңгеге қымбаттады. Демек, суды бұру қызметінің бір текше метрі 58 теңгеден 85,77 теңгеге көтерілді.
Айта кетуіміз керек, тарифтердің айтарлықтай көтерілуіне байланысты тұтынушыларға есептегіш құралдарды орнату тиімді болмақ. «Семей Водоканал» МКК хабарлауынша, бүгінгі күні есептегіш құралдарды орнатуға техникалық мүмкіндігі бар 58 912 абоненттің 53 555 тұтынушысы орнатқан. Сондай-ақ барлық 2 772 заңды тұлғалар да толық көлемде есептегіш құралдармен қамтамасыз етілген.
Кәсіпорынның ақпаратынша, ағымдағы жылдың 1 шілдедегі жағдайы бойынша, тұрғындардың кәсіпорын алдындағы қарызы 114 млн. 574,5 мың теңгені құрайды.
Асан МЫРЗАХАНОВ, «Семей таңы»
