Қала әкімі Ермак Сәлімов «Спартак» футбол клубының ұжымымен кездесіп, команда мүшелерімен жақын танысып, жергілікті аяқдоп ахуалына қанықты.
Семейде спорттың дамуы жақсы жолға қойылғаны белгілі. Оның ішінде футболдың орны бөлек. Кезінде теңбіл доппен жасыл алаңда жасындай жарқылдаған әйгілі «Елім — ай» командасының, ел чемпионатын 3 рет ұтып, өңірдегі осы спорт түрінің дамуына сүбелі үлес қосқаны жанкүйерлер жадында. Бүгінде әйгілі аға буынның жеңісті жолын «Спартак» құрамасы жалғастыруда. Қаржылық қиындықтарға қарамастан, футболшыларымыз 2013 жылы Премьер-лигаға өткен еді. Алайда елдің басты чемпионатында еурокубоктарда шыңдалған азулы қарсыластармен тайталасуға тәжірибенің аздығы кедергі болды. Бүгінде бірінші лигада өнер көрсетіп жүрген семейліктер үздіктер қатарында. Ойыншыларды жаттықтыратын білікті бапкер Алексей Петрушин ұжымды қайтадан Премьер-лигаға шығаруды көздеуде.
{jcomments on}Ойыншылармен жүздескен Ермак Сәлімов футбол жанкүйері екенін айта келе, «Спартактың» материалдық әрі қаржылық жағдайынан да құлағдар екенін жеткізді. Сондай-ақ шаһар басшысы команда жетістіктерін еселей түсу жайлы ұсыныстарымен де бөлісті.
— Семей үшін футбол қаншалықты маңызды екендігін жақсы түсінемін. Мәселенің барлығы біз үшін айқын. Өңір басшысы да келешекте Шығыс Қазақстандағы аяқ доптың дамуын Семей қаласымен байланыстыруда. Ал оны жүзеге асыру — сіз бен біздің ортақ шаруамыз. Қазіргі күні командаға қатысты барлық мәселені бірден шешіп береміз деп уәде ете алмаймыз. Осыдан біраз уақыт бұрын өткен жиында Даниал Кенжетайұлы қала бюджетін өзіндік аударылымдардан қалыптастыруды тапсырды. Соның аясында жергілікті кәсіпкерлерді осы спортқа демеушілік жасауға тартуды жоспарлаудамыз. Арнайы қор құру туралы ұсынысымыз жекелеген азаматтар тарапынан қолдау тапқан болатын. Ал өзге де өзекті сауалдарыңызды мен тыңдауға әзірмін. Бүгінгі таңда әлеуметтік тараптан туындаған қиындықтарға қарамастан, сіздер күш-жігерлеріңізді аямаудасыздар. Өзге мәселелерді біртіндеп ретке келтіреміз,- деді Ермак Бидахметұлы.
Өз кезегінде жергілікті аяқдоп шеберлері қала басшысына Премьер — лигада өнер көрсету үшін аянып қалмайтындарын жеткізді. Сонымен қатар «Спартак» футбол клубының капитаны Сергей Куцов шаһар басшысына әкімнің есімі мен 10-шы нөмір бейнеленген футбол жейдесін ресми түрде сыйлық ретінде табыстады. Кездесу соңында команда толық құраммен естелік суретке түсті.
Жақсылық СҮЛЕЙМЕН, «Семей таңы»
