Жуырда қалалық әкімдікте ҚР Футбол федерациясының президенті Ерлан Қожағапановпен кездесу болып өтті. Бұл басқосуға қала әкімінің орынбасары Надежда Шарова, қалалық мәслихаттың хатшысы Бейсенбек Ақжалов, дене шынықтыру және спорт бөлімінің басшысы Мұрат Құржықаев, ҚР Футбол федерациясы төрешілер алқасы және инспекциялау департаментінің директоры Маттеуо Трифалони, ҚР КФЛ—ның төрағасы Бағлан Ергешев, «Спартак» ФК—ның президенті Зейнетолла Ахметов пен спорт мектептерінің басшылары және футбол ардагерлері қатысты. Мәртебелі меймандар сапарының мақсаты — ел футболын дамытуға бағытталған 2016 — 2022 жылдарға арналған құжатпен жергілікті спортсүйер қауымды таныстыру.
{jcomments on}Лауазымды өкілдер отандық футболды дамыту бағдарламасымен таныстырды. Құжатта балалар мен жасөспірімдер аяқдобын қарқын алдыруға, ұлттық құрама институтын құруға, футбол инфрақұрылымын жақсартуға, клубтар мен төрешілір әлеуетін арттыруға, жанкүйерлермен бірлесе жұмыс жасауға баса мән беріліпті. Сондай-ақ спорттың осы түрімен шұғылданатын жастар санын арттыруға да ерекше көңіл бөлінуде. Ерлан Тоқтарханұлы айтып өткендей, республикадағы футбол клубтары шетелдік ойыншыларға қыруар қаржы жұмсайтын көрінеді. Сол себептен де ҚФФ атқа-ру комитетінің соңғы жиналысында Премьер-лига командалары арасында өнер көрсететін шекара асып келген жалдамалы ойыншылардың санын 8-ден 7-ге қысқарту туралы шешім қабылданыпты. 5-уі алаңда болса, қосалқы құрамда 2-уі отырады. Ал 1-ші лига командалары сапынан легионерлер түбегейлі алынып тасталған. Бұдан бөлек аталмыш жиында шешімін тапқан тағы бір мәселе бар. Атап айтсақ, келер маусымнан бастап, Қазақстан Премьер-лига додасында ескі формат бойынша 14 команда бақ сынаспақ. Федерация басшысының сөзінше, «Спартак» клубының жоғары лигада өнер көрсетуге толық мүмкіндігі бар көрінеді.
— Жуырда сіздердің ойыншыларыңыз «Восток» командасымен шеберлік байқасқан еді. Сонда алаңға 7 мыңнан астам жанкүйер жиналғанын естідім. Семей бұрыннан бері Премьер-лига тобында болуы тиіс. Сондықтан да олар — басты үміткерлердің бірі. Балалар және жасөспірімдер футбол орталықтарында қазіргі күнде 5 мыңнан аса балғын жаттығуда. Осы салаға зейін аударуымыз қажет. Мысал келтірсек, «Болат АМТ» Теміртау командасы сапындағы ойыншылар 70% жергілікті футболшылар. Ал турнир — кесте-сінде олардың жоғары сатыда тұрғанын ескеру керек. Өскемендік «Восток» бір ғана легионермен шектеліп отыр. Футбол клубтары өз бюджетінің 30 пайызын жергілікті өрендердің бапталуына жұмсағаны абзал, — деді Ерлан Қожағапанов.
Сонымен қатар Ерлан Тоқтарханұлы аймақ басшысы Даниал Ахметовпен өткен кездесуі жайлы ақпаратпен де бөлісті. Ол жүздесуде Даниал Кенжетайұлы ҚФФ президентіне өңірде облыстық футбол академиясының негізі қаланатынын жеткізіпті. Болашақ спорттық орталық еуропалық стандартқа лайықталып салынбақ.
Жақсылық МҰРАТҚАЛИ, «Семей таңы»
