Қалалық кәсіподақтар үйінде медиация әдістерін қолдану арқылы «Еңбек дауларының алдын алу» тақырыбында дөңгелек үстел өтті. Жиынға ШҚО кәсіподақтар кеңесінің төрайымы Нұржан Түсіпова, салалық кәсіподақтардың басшылары мен жергілікті билік өкілдері қатысты.
{jcomments on}Жиында түрлі ұйымдарда жұмыс беруші мен қызметкер арасында жиі туындайтын даулы мәселелер туралы сөз қозғалды. Кәсіподақ бірлестіктері тиісінше қос тарапты бір ымыраға келістіруі тиіс екені, оларға белгілі бір кәсіпорында немесе ұйымда орын алған кикілжіңді сотқа дейін жеткізбей, жұмыс беруші мен жәбірленуші тарапты бейбіт келісімге отырғызу миссиясы жүктелетіні айтылды. Еңбек дауы жекелей және ұжымдық болып бөлінсе, Семей аймақтық салалық кәсіподақтардың координациялық кеңесінің төрағасы Сәбит Ибраев жеке тұлғалардың ісінен гөрі ұжымдық жанжалдардың түйінін тарқату күрделірек екенін, себебі кейде бір емес, бірнеше адамның талабын әп-сәтте орындау мүмкін емес екенін айтады.
— Ұжымдық келіспеушіліктер көбіне шағын және орта бизнес кәсіпорындарында кездеседі. Оған сәйкес, жалақыны дер кезінде төлемеу әрі қанағаттанбау, еңбек құқықтарының бұзылуы жайлы шағымдар түседі. Сондай-ақ жұмыс уақытының белгілі нормадан асып кетуі жайлы мәселелер орын алады. Қазіргі таңда жұмыс беруші, кәсіподақ ұйымдары мен билік органдары арасында 3 жақты келісім жасалған. Соның негізінде жұмыс комиссиясы құрылып, олар өздеріне жүктелген міндеттерін атқаруда. Комиссия әр ай сайын арызданушы азаматтарды қабылдап, соған сәйкес шара қолданады,- деп атап өтті Сәбит Молдатьянұлы.
Айта кету керек, 10 маусым күні Астанада ҚР Кәсіподақтар федерациясының 24-ші съезі өткен болатын. Съезде Федерация төрағасы Әбілғазы Құсайынов 5 жылда атқарылған жұмыстардың нәтижесі туралы баяндама жасаған. Оның мәліметіне қарағанда, Республика бойынша кәсіподақ құрамына кірген ел тұрғындарының саны жылдан-жылға арта түсуде. Қазіргі уақытта бірлестікке 2 миллионнан астам адам тіркелген екен. Дөңгелек үстел барысында аталмыш съезге қатысып келген делегаттардың бірі, облыстық кәсіподақтар кеңесінің төрайымы Нұржан Түсіпова жиында қозғалған басқа да тың ақпараттармен бөлісті.
— Елордада өткен алқалы жиын барысында көпшілік алдында баяндама жасаған ҚР Денсаулық сақтау және әлеуметтік даму министрі Тамара Дүйсенова жаңадан әзірленіп жатқан Еңбек Кодексі заң жобасы жайында кеңірек тоқталған еді. Өздеріңіз білетіндей, Елбасының 5 институционалдық реформаны жүзеге асыруға бағытталған «100 нақты қадамының» 83-ші қадамында еңбек қатынастарын ырықтандырып, оны жаңадан әзірлеуге бағытталғаны жөнінде айтылған. Бұл дегеніміз ұжымдық-еңбек қатынастарын қайтадан қарастыру қажеттігін білдіреді. Соған байланысты Тамара Қасымқызы білікті мамандардан жасақталған топ заң жобасының бүге-шүгесін дайындау үстінде екендігін жеткізді. Оның нұсқасымен кәсіподақ өкілдерін алдынала 15 тамызға таман таныстыруы ықтимал. Бұл орайда біз қазіргі уақыттағы Еңбек Кодексіндегі кейбір тұстарды өзгеріссіз қалдырғымыз келсе, онда өз ұсыныстарымызды жоғарыда атап өткен жұмыс тобына дер ке-зінде жіберуіміз қажет,- деді Нұржан Құрмантайқызы.
Ж.МҰРАТҚАЛИ, «Семей таңы»
