Қалалық әкімдікте шаһар басшысы Ермак Сәлімовтің қатысуымен Семей қаласы футбол федерациясының кезектен тыс отырысы өтті.
Күн тәртібінде екі мәселе қарастырылды. Атап айтсақ, бірінші лига командалары арасындағы ел чемпионатындағы «Спартак» футбол клубының ойын барысы мен қалалық футбол федерациясы президентін тағайындау болды.
{jcomments on}Алғашқы сұрақ бойынша «Спартак» футбол клубының спорт директоры Андрей Пинчуков баяндады. Ол қала әкімін футбол клубының ел чемпионатына дайындық барысы, құраманың қайта жасақталған құрамы және бүгінгі таңдағы атқарылып жатқан жұмыстарынан мағ-лұмат берді. Жиын барысында сондай-ақ қала намысын қорғап жүрген аяқдоп шеберлерінің әлеуметтік ахуалы мен клуб жұмысын жандандыру жайы да кеңінен талқыланды. Семейлік аяқдопшылар биылғы маусымды жаман бастаған жоқ. «Спартак» футбол клубының спорт директоры Андрей Пинчуковтің айтуынша, осы уақытқа дейін команда он тур өткізген және оның 7-де жеңіске жетіпті. Ал екі ойында есе жіберіп, бір ойында тең түскен.
Жиынның соңында тағы бір маңызды шешім қабылданды. Қалалық футбол федерациясының өкілдері Семей футбол федерациясының президентін тағайындады. Жиынға қатысушы өкілдердің бірауыздан қолдауы, жанкүйерлердің өтініші негізінде Семей футбол федерациясының президенті болып қала әкімі Ермак Сәлімов тағайындалды. Жиын соңында қатысушылар қала билігі тарапынан жасалынып жатқан қамқорлық шаралар үшін аяқдопшылар мен жанкүйерлер атынан алғыстарын білдірді.
Асан САМАТҰЛЫ,
«Семей таңы»
