Маусым айының соңында Шымкент қаласында спорттың жеңіл атлетика түрінен өткен Қазақстан Республикасының ҮІІІ Жазғы универсиадасында семейлік жастар команда бойынша үздіктер қатарынан көрінген-ді. Дүбірлі додадан оралған жастар бапкерлерімен бірге қаладағы «Спартак» стадионында жергілікті БАҚ өкілдеріне сұхбат беріп, жарыс-тан алған әсерлерімен бөлісті.
Еліміздің барлық қалаларындағы жоғары оқу орындарының студенттері арасында өткен жарыста Семей қаласының Шәкәрім атындағы мемлекеттік университетінің студенттері қала намысын қорғап, команда құрамында 8 студент өнер көрсеткен болатын. Жеңіл атлетика спортына әуестеніп жүрген жастарды Семей қаласының Шәкәрім атындағы мемлекеттік университеті құрама командасының бапкері Рақымтай Абаков бастап апарыпты. 40 жылдан бері аталмыш салада еңбек етіп жүрген бапкердің айтуынша, кіл мықтылар қатысқан дүбірлі додада семейлік жастар жекелей де жақсы нәтиже көрсетіп, жалпы командалық есеп бойынша 12 команданың ішінен 4 орынды еншілеп қайтқан екен. Айта кету керек, байрақты бәсекеде Алматы қаласындағы Әл-Фараби атындағы Қазақ ұлттық университетінің студенттері І орынды қанжығаға байласа, ІІ орынға М.Әуезов атындағы Оңтүстік Қазақстан мемлекеттік университетінің студенттері, ІІІ орынға Павлодар мемлекеттік педагогикалық институтының студенттері ие болған. Ал жекелей сайыста Евгений Архипов пен Ольга Нестерова жеңіс тұғырынан көрініп, алтыннан алқа тақса, тағы да бірнеше семейлік студент күміс, қола медальдарды қоржынға салған.
{jcomments on}Зор қолдау көрсеткені үшін, қалалық дене шынықтыру және спорт бөліміне ризашылығын білдірген Рақымтай Абакұлы Шәкәрім университетінде жеңіл атлетиканың дамуына ерекше көңіл бөлінетінін, шәкірттерінің жаттығуды үзбей жасайтынын, олардан болашақта үлкен үміт күтетінін жеткізді.
— Аптаның 5 күнінде тәулігіне 2-3 сағат уақыттарын студенттеріміз жаттығу жасауға жұмсайды. Жаздың ыстығына, қыстың суығына да қарамаймыз. Есесіне еңбегіміз де текке кетпейді. Біріншіден, спорттың денсаулыққа пайдасы мол және жастардың еңбекқорлығын арттыра түседі. Шәкірттеріміздің алдағы уақытта әлі талай жарыстарда жетістіктерге, толайым табыстарға қол жеткізетініне сеніміміз кәміл, — дейді Р. Абаков.
Универсиадада ерлер арасында 800 метр қашықтыққа жүгіру сайысы бойынша жеңіске жеткен Евгений Архипов:
— Спортпен айналысып жүргеніме 1 жылдай уақыт болды. Биыл Семей қаласының Шәкәрім атындағы мемлекеттік университетінің І курсын тәмамдадым. Жеңіл атлетикамен айналысуды университет қабырғасына келген соң ғана бастағанмын. Ата-анам да осы саланың үздіктері бол-ған. Олардың жолын енді мен жал-ғап, спортты өмір бойы жаныма серік еткім келеді. Қандай да бір жеңіске жетіп жатсам, ол бапкерімнің жемісі деп білемін, — дейді желаяқ жігіт.
Нұрдәулет КӘКІШЕВ, «Семей таңы»
