Шілде айының алғашқы күндері Өскемен қаласында алғаш рет облыстық паралимпиадалық ойындар болып өтті. Оған 70-ке тарта спортшы қатысты. Сайыс бағдарламасына жеңіл атлетика, суда жүзу және пауэрлифтинг сынды спорттың үш түрі енгізілді. Жарыс қорытындысына сәйкес, жалпыкомандалық есепте Семей қаласының құрамасы топ жарды. Бұл жайында Семей қаласының ақпараттық орталығында өткен баспасөз мәслихатында мәлім болды.
{jcomments on}Мүмкіндігі шектеулі жандар арасында өткен алғашқы аймақтық ойындарда қала қоржынына жүлде салып, 400 метр қашықтыққа жүгіруден Кәміл Хазиахметов, Марат Әлиасқаров алдарына жан салмаса, 800 метрге жүгіруден Қайрат Ахметжанов өзгелерден оқ бойы озып, мәреге бірінші жетті. Пауэрлифтингтен яғни зіл темірді жатып көтеруден семейлік Андрей Москалевке тең келер қарсылас табыл- ған жоқ. Сонымен қатар Серікбек Айсаулин күміс, Александр Агафонов қола жүлде еншіледі. Спорттың осы түрінен қыздар арасында Ольга Близнец пен Ольга Любашова да алтыннан алқа тақты. Жерлестеріміз жалпы саны 7 алтын, 2 күміс, 3 қола медаль иеленіп, өздерінің мықтылығын дәлелдей білді. Білікті бапкер Андрей Алтайбаевтың айтуынша, бұл жарысқа қаңтар айынан бастап тыңғылықты дайындық жүргізіліпті.
— Спорт алаңы көрермендерге лық толы болды. Жарыс өңіріміздегі мүмкіндігі шектеулі жандардың спортқа деген қызығушылығын арттыра түсті. Олардың спортпен кәсіби түрде шұғылдануға құштарлығы оянды. Алдымен қала көлемінде турнир өткізіп, мықтыларды анықтауға тура келді. Үздік шыққандар Өскеменде өткен паралимпиадаға жолдама алды. Міне, өздеріңіз көріп отырғандай алғашқы паралимпиадалық ойында жеңімпаз атанып отырмыз. Семей қаласының әкімі Ермак Сәлімовке қолдау білдіргені үшін алғысымызды білдіреміз. Дене шынықтыру және спорт бөлімі де қолдау танытты. Енді ШҚО – ның намысын тамыз айында Павлодар қаласында өтетін республикалық біріншілікте қорғайтын боламыз, — дейді Андрей Викторович.
Облыстық паралимпиадалық ойындарда бағын сынап, жеңіс тұғырынан көтерілген жандардың бірі — Кәміл Хазиахметов. Ол 2008 жылдан бастап спортпен кәсіби түрде айналысып келеді. Байрақты бәсекелер мен айтулы жарыстарда Кәміл олжасыз қайтқан емес. Спортшы енді жетістігін республикалық чемпионатта еселей түсуді жоспарлап отыр.
— Жаттықтырушым әрі досым Андрей Викторовичтен өз клубына шақырту алдым. Сол сәттен бастап пауэрлифтингпен шұғылдана бастадым. Жағдайымыз барлық жағынан қарастырылған. Жоғарыда бапкерім атап өткендей, клубтық, қалалық турнирлерге қатысып, өзара бәскелестік қалыптастырдық. Қазіргі таңда соның жемісін көріп отырмыз. Пауэрлифтингпен қатар менің жеңіл атлетикадан да көрсеткіштерім жақсарып келеді, — дейді спортшы Кәміл.
Ж. СҮЛЕЙМЕН, «Семей таңы»
