Семей қалалық әкімдігінде қала әкімінің орынбасары Надежда Шарованың төрағалығымен әйелдер істері және отбасылық — демографиялық саясат жөніндегі қалалық комиссияның кезекті отырысы өтті.
Комиссия отырысында үш мәселе қаралды. Атап айтқанда, Мемлекет басшысының бес институционалдық реформасын жүзеге асыруға бағытталған «100 нақты қадамды» іске асыруда қалалық әйелдер істері және отбасылық – демографиялық саясат жөніндегі комиссияның міндеті, шағын және орта бизнес саласында әйелдердің іскерлігін дамыту, салауатты өмір салтын насихаттау әрі қазақстандық жанұяны спортқа баулу мәселелері талқыланды,
{jcomments on}
Ұлт Жоспары – «100 нақты қадамды» іске асырудағы аталмыш комиссия міндеті жайында Семей қалалық ішкі саясат бөлімінің басшысы Айдар Садырбаев сөз алды. Айдар Серікқазыұлы өз кезегінде «100 нақты қадамды» нақты жүзеге асыру аясында ақпараттық және идеологиялық іс — шаралардың жоспары бекітілгенін атап өтті. Аталған іс – шаралар негізінде әрбір мемлекеттік мекеме әлеуметтік желілерде стратегиялық құжат жайлы мәлімет беретін аккаунттар құрған. Бүгінде жарияланған мағлұматтар ғаламтор пайдаланушыларының оң көзқарасына ие болуда. Сондай-ақ осы бағытта кәсіпорын, ұйым, мекеме басшыларымен бірлескен шаралар қабылданып, қала тұрғындарын ақпараттандыру мақсатында біршама жұмыстар атқарылыпты.
Комиссия отырысында нәзік жандылар арасындағы кәсіпкерлікті дамыту мәселесі де назардан тыс қалмады. Семей қалалық кәсіпкерлік бөлімінің бас маманы Әйгерім Садықованың айтуынша, Семей өңірінде 25 мыңнан аса нәзік жандылар шағын және орта бизнеспен айналысады екен. Сондай–ақ әйелдер кәсіпкерлігін арттыру мақсатында «Даму» кәсіпкерлікті дамыту қоры» АҚ арқылы әйелдер бизнесін қаржыландыру бағдарламасы іске асырылуда. Қазір Семей қаласында өндіріс орындарында еңбек ететін бес мыңнан аса әйелдердің көбісі жеңіл өнеркәсіп саласында жұмыс істейтін көрінеді. Ал ауылды жерлерде нәзік жандылар «Жұмыспен қамту жол картасы — 2020» бағдарламасының игілігін көруде. Ауылдағы әйел кәсіпкерлердің де қарап отырмай, бағдарламаның тиімділігін барынша пайдаланып отырғанын Ертіс ауылдық округінің әкімі Залиха Межекенованың сөзі дәлелдей түседі.
— Ертіс ауылдық округінде 4 жыл ішінде «Жұмыспен қамту жол картасы — 2020» бағдарламасы аясында 47 адам несие алып, шаруаларын бастаған. Биылғы жылы осы күнге дейін 11 адам өтініш білдірген. Ауылымыздың азаматшалары үнемі белсенділік танытып, мемлекеттік бағдарламалардан шет қалған емес,- дейді Залиха Тоқанқызы.
Ал қалалық мәслихат депутаты Әсетхан Досқожанов еңбекте бағы жанған нәзік жандыларды мейілінше кеңінен насихаттау керектігін атап өтті. Халық қалаулысының айтуынша, әйелдер қауымын тек 8 наурыз төл мерекелерінде ғана құттықтаумен шектелмей, үнемі еңбектерін бағалап, өзгелерге үлгі ретінде көрсете білу керек.
Кезекті комиссия отырысында қаралған тағы бір мәселе — салауатты өмір салтын насихаттау әрі қазақстандық жанұяны спортқа баулу. Қалалық дене шынықтыру және спорт бөлімінің бас маманы Қуат Исажанов атап өткендей, елімізде салауатты өмір салтын насихаттау мен бұқаралық спортты дамытуға барлық жағдай жасалып келеді. Бүгінде Семей шаһарында 377 спорттық нысан халық игілігі үшін жұмыс істеп тұр. Оның ішінде 7 бассейн, 4 арнайы алаң, 5 спорт кешені, 2 дене шынықтыру және сауықтыру кешені, 123 спорт зал, 5 шаңғы базасы, 21 жасанды футбол алаңы бар. Қуат Исажановтың айтуынша, 2012 жылдан бері бұқаралық спортпен айналысатын семейліктердің қатары біршама ұлғай-ған. Ағымдағы жылдың бірінші жартыжылдығында жүз мыңнан аса қала тұрғыны спортпен белсенді түрде шұғылданатыны анықталыпты.
Жақсылық МҰРАТҚАЛИ, «Семей таңы»
