Апта сейсенбісінде Семейдегі «Шығыс Қазақстан аймақтық энергетикалық компаниясы» АҚ ғимаратында «Нұр Отан» партиясының қатарына қабылдау салтанаты өтті.
«Шығыс Қазақстан аймақтық энергетикалық компаниясы» АҚ қызметкерлерінің «Нұр Отан» партиясына өткен 27 жаңа мүшесіне партиялық билеттер табысталды. Аталмыш іс-шараға Семей қаласы ішкі саясат бөлімінің басшысы Айдар Садырбаев пен «Нұр Отан» партиясы Семей қалалық филиалы Саяси кеңесінің мүшесі, партия ардагері Серік Төлеуғалиев қатысып, энергетиктерге партиялық билеттерді табыс етті.
{jcomments on}- Жыл сайын қатарымызға қосылғысы келетіндер санының арта түсуі бізді қатты қуантады. Жалпы, партияға мүшелікке өту үлкен саяси жауапкершілік жүктейді. «Нұр Отан» партиясы Мемлекет басшысының тапсырмаларын нақты іске асырып, халық арасында мемлекет саясатын жан-жақты түсіндіріп, оның жүзеге асуына тікелей атсалысады. Сондықтан да сіздерді партия қатарына өтулеріңізбен шын жүректен құттықтай отырып, еліміздің дамуына сіздер де өз үлестеріңізді қосуларыңызға тілектеспін, — деп атап өтті Серік Төлеуғалиұлы.
Ал партия қатарына қосылғандарды құттықтаған ішкі саясат бөлімінің басшысы Айдар Садырбаев:
— Елбасы ұсынған 5 институционалды реформаны жүзеге асырудағы «100 нақты қадам» баршамызға үлкен жауапкершілік жүктеп отыр. Бүгінгі біздің мақсатымыз — еліміздегі бейбітшілік пен тұрақтылықты, қоғамдағы тыныштық пен ұлтаралық келісімді сақтай отырып, қарқынды дамуды жалғастыру. Сіздердің ұжымдарыңыз Елбасының алға қойған мақсат — міндеттерін жүзеге асыруда алдыңғы қатардан көрінетініне сенімдімін. Баршаларыңызды партия қатарына қосылуларыңызбен құттықтаймын, — деді Айдар Серікқазыұлы.
Айта кету керек, бүгінде «Нұр Отан» партиясының тоғыз мыңнан астам мүшесі Семей қаласының тұрғындары болып табылады.
Асан МЫРЗАХАНОВ, «Семей таңы»
