Семей өңірінде суға шомылу кезеңі басталғалы бері 12 адам суға кетіпті. Бұл тізімнің ішінде 1 бала бар. Ал шілденің екінші жартысы аптапты күндерге толы болғандықтан Ертіс жағалайтындардың қатары артатыны анық. Сол себептен де Семей қалалық судан құтқару қызметінің мамандары тұрғындарға мейлінше сақ болуға шақырады.
Судан құтқару қызметінің маманы Тасболат Көшкінбаевтың айтуынша, судағы қауіпсіздік ережелерін БАҚ арқылы түсіндіру жұмыстарын жүргізгенмен құлақ асар адам аз болып тұр. Әсіресе, Шүлбі су қоймасындағы демалушы жұртшылықты сақтандыру шараларын күшейтуді қажет етеді. Мұнда оқыс жағдайлардың алдын-алу үшін, судан құтқару қызметінің мамандары тәртіп сақшылары және төтенше жағдайлар басқармасымен бірлескен рейд жүргізеді екен. Сондай-ақ жазғы уақытта балалардың қауіпсіздігін қамтамасыз ету мақсатында сауықтыру лагерлерінде де ескерту шаралары өткізілуде. Қалалық құтқарушылардың қызмет көрсету аумағына Бесқарағай, Бородулиха, Шүльбі және Семейдегі Ертіс жағалаулары кіреді. Тасболат Жақыпұлының сөзінше, күнделікті 6 адамнан жасақталған топ кезекшілік атқарады екен. Негізінен шаһарда арнайы жағажай қарастырылмағандықтан Ертіске суға түсуге рұқсат берілмеген. Соған қарамастан тұрғындар қауіпті аумақтарға барып, өз өмірлерін қатерге жиі тігетін көрінеді.
{jcomments on}Ертістегі қауіпті орындарға ескі көпір маңы, Түйемойнақ аралы, Мирный кенті мен Шәкәрім атындағы МУ спорт кешенінің аумағындағы жағалаулар жатады.
— Ертістің осы аралықтағы арнасының ағысы қатты. Сондай-ақ су түбіне тартып әкететін иірімдері де аз емес. Осыны жағалауға келгендерге түсіндіріп, ескертіп айтқанымызбен құлақ асатындар аз болып тұр. Бүгінде өзен жағасындағы бақытсыздықтардың 60% ішімдіктің салдарынан орын алған. Сонымен қатар балалардың қатысуымен болған фактілер 20% құрап отыр. Көбіне ата-аналар бүлдіршіндерін өзен бойында қараусыз қалдырып кетеді. Халық әсіресе Парус пен «Судремзавод» аудандары маңында жиі демалады. Суда шомылу тәртібін бұзғандарға айыппұл салу біздің құзыретмізге кірмейді. Ол ішкі істер органдары қызметкерлерінің міндеті. Біз тек тұрғындармен әңгімелесіп, түсіндіру жұмыстарымен ғана шектелеміз,- дейді Тасболат Көшкінбаев.
Бүгінгі күнде Семей қалалық судан судан құтқару қызметінің иелігінде 2 көлік, 2 темір қайық, 4 моторлы қайық пен 5 үрлемелі қайық бар. Жеке құрам 15 адамнан тұрады екен. Сұқбат соңында судан құтқару маманы жаз маусымында қалалықтарды өзен бойындағы қауіпсіздік ережелерін мейілінше қатаң сақтауын сұрап, алкагольді ішімдіктерден бас тартып, балаларды назардан тыс қалтырмауын ескертті.
Ж. СҮЛЕЙМЕН, «Семей таңы»
