Шілде айының 9 — 12 –сі күндері Ресейдің Рубцовск қаласында 7 — ші Алтай олимпиада ойындары болып өтті. Халықаралық жарысқа семейлік спортшылар да қатысып, жақсы нәтижелерге қол жеткізді. Бұл жайында Семей қаласы дене шынықтыру және спорт бөлімінің ұйымдастыруымен өткен баспасөз мәслихатында мәлім болды.
{jcomments on}Жарыс спорттың 16 түрінен өткен екен. Семейлік сайыпқырандар жеңіл атлетика, гір тасын көтеру, полиатлон, суда жүзу және мылтық атудан бақ сынаған. Жерлестеріміз әсіресе жеңіл атлетиканың эстафеталық бәсекесі мен ядроны итеруден қарсыластарынан қара үзіп, алтыннан алқа тағыпты. Сондай-ақ гір көтеру мен мылтық атудан да қоржынға медаль түсіпті.
Жарыстың негізгі мақсаты Қазақстан мен Ресей арасындағы достық, әріптестік қарым – қатынас негізінде өңіраралық байланысты нығайту болып табылады. Алдағы уақытта екі елдің арасындағы ынтымақтастықты нығайта түсу мақсатында көрші ел спортшыларын облыс әкімінің жүлдесі сарапқа салынатын халықтық ойындарға шақыру көзделіп отырған көрінеді. Сонымен қатар көршілес елдің спорт басқармасының басшыларымен өткен кездесудің нәтижесі бойынша бірқатар келісімдерге қол жеткізілген.
– Мұндай ірі жарысқа алғаш рет қатысып тұрғандықтан, біз тек спорттың 5 түрінен күшімізді пысықтауды жөн көрдік. Жарысқа қонақ ретінде шақырылғандықтан көбіне жас спортшыларды апардық. Мұндағы басты мақсатымыз спортшылардың тәжірибе жинақтауына мүмкіндік жасау болатын. Соған қарамастан жоғары нәтижеге қол жеткізіп отырмыз. Келер жылы аталмыш турнирге тыңғылықты дайындық жүргізіп, бекітілген барлық ойындар бағдарламасына өз саңлақтарымызды ұсынатын боламыз. Әлбетте біз де өз тарапымыздан көршілес өңірдің командасын аймақта өткізілетін үлкен жарыстарға шақырту жіберіп отыруға келістік,- деді Мұрат Мұрсаханұлы.
Алтай олимпида ойындарында топ жарған жандардың бірі — Ольга Хижнякова. 21 жастағы бойжеткен ядро итеруден алдына жан салмай 12,74 көрсеткішімен қоржынға алтын салды. Ольга енді әлемдік додаларда олжа салуды мақсат етуде. Оның жеке рекорды 13,46 метрді құрауда. Сонымен қатар, Мұрат Мұрсаханұлы аймақ командасы қыркүйек айында Рубцовск қаласында қала күніне орай ұйымдастырылатын жа-рысқа да шақырту алғанын атап өтті.
Ж. СҮЛЕЙМЕН,
«Семей таңы»
