Апта сәрсенбісінде қаламыздағы іргелі жоғары оқу орындарының бірі Қазақ инновациялық гуманитарлық-заң университетінде жастар арасында салауатты өмір салтын қалыптастырып, құқықбұзушылық фактілерінің алдын алу шараларын ұйымдастыру мақсатында арнайы жиын болып өтті. Семей қаласы әкімінің орынбасары Надежда Шарова өткізген басқоуға қаламыздағы ішкі істер органдары саласы қызметкерлері мен жастар ұйымдарының өкілдері, заңгерлер қатысты.
{jcomments on}Басқосу тақырыбына сай елеулі мәселелер қозғалды. Атап айтсақ, бүгінде жастар арасындағы әкімшілік құқықбұзушылық фактілері азаймай отыр. Әкімшілік жазаға кесілгендер арасында колледж студенттері де бар екен. Жас буын арасында жиі тіркелетін мұндай келеңсіздіктерге негізінен қоғамдық орындарда шемішке шағу мен темекі тұқылын тастау жатады. Жиынға қатысушылар тарапынан осы себепті де жастар арасында заң талаптарын түсіндіру жұмыстарын күшейту қажет деген пікір айтылды. Себебі олардың көпшілігі “мұндай тәртіп бұзушылыққа да жаза бар екенін білмедік” деп жалтаратын көрінеді.
Дегенмен жастар өміріне шырай кіргізетін жағымды жаңалықтар да мол. Атап айтсақ, ағымдағы жылы «Жас сақшы» студенттер жасағының саны артыпты. Яғни қоғамдық тәртіпті сақтауда өскелең буын құқыққорғау органдары қызметкерлеріне қолғабыс жасауда. Бұл ретте қаламыздағы бірқатар колледждермен аталмыш ҚазИГЗУ студенттерінің белсенділіктері аса жоғары екен.
Қуаныш ЖОЛЫМБЕТ,
«Семей таңы»
