Семейге жұмыс сапарымен келген Қазақстан Республикасы Парламенті Мәжілісінің депутаттары Александр Милютин және Светлана Ферхо «Нұр Отан» партиясының Семей қалалық филиалында қоғамдық қабылдау өткізіп, қала тұрғындарын жеке сауалдары бойынша қабылдады.
{jcomments on}Қабылдауға келгендер тарапынан бірқатар ауқымды мәселелер көтерілді. Атап айтқанда, Семей сынақ полигонынан зардап шеккендерді әлеуметтік қорғау, шетелдің және еліміздің емдеу мекемелеріне емделуге квота бөлу, зейнетақы төлеу, кәсіпкерлердің құқығын қорғау сынды тағы басқа да бірқатар мәселелер көтерілді.
Мәжіліс депутаттарымен өткен кездесуге жеке мәселесімен алғаш болып жүгінген Ирина Лейман болды. Ол баласының сирек кездесетін атопиялық дерматит ауруына шалдыққанын айтып, халық қалаулыларынан шетелде емделуге қаржылай көмек сұрады. Ирина Лейманның айтуынша, қыз баланы бұған дейін шетелдерде арнайы қордың бөлген қаражатымен емдеткен екен. Алайда дертінен толықтай сауығып кету үшін арнайы сауықтыру орындарында болып тұруы керек. Сондай орындардың бірі Ресей Федерациясы Алтай аймағында бар көрінеді. Оның үстіне баланың анасы Ирина — екінші топтағы мүгедек. Сондықтан да ондай алыс жерге өз қаражатымен баруға мүмкіндігі жоқ. Сол үшін де халық қалаулыларынан, қажетті ем шараларын жүргізу үшін, қалталы азаматтардың көмек көрсетуіне ұйтқы болуын сұрады. Мәжіліс депутаттары Александр Милютин мен Светлана Ферхо алдағы уақытта бұл мәселенің шешімін табуға көмек қолын созатындықтарын жеткізді. Депутаттар сондай-ақ дәрігерлерге баланы анасымен бірге Алакөлге емделуге жіберу жағын қарастыруды тапсырды.
Депутаттармен жүздесуге келген келесі қала тұрғыны — «Поколение» қоғамдық бірлестігінің төрайымы Ольга Петровская. Қала тұрғыны Семей сынақ полигонынан зардап шеккендердің әлеуметтік қорғалуы жөнінде өз пікірін білдірді. Оның айтуынша, Семей ядролық сынақ полигонындағы ядролық сынақтардың салдарынан зардап шеккен азаматтарды әлеуметтік қорғау туралы Заңға өзгерістер қажет. Мәжіліс депутаттары бұл ұсыныстың бұған дейін де бірнеше мәрте көтерілгенін, сонымен қатар халық қалаулылары тарапынан бастама көтеретінін атап өтті. Сондай-ақ мәжілісмендер қалалық «Нұр Отан» партиясы филиалына тиісті министрліктердің өкілдерін арнайы Семейге шақырып, осы мәселені халыққа егжей — тегжейлі түсіндіру жөнінде ұсыныс жасау керектігін айтып өтті.
Мәжіліс депутаттарының сайлаушылармен кездесулері ашық түрде өтті. Өз кезегінде халық қалаулылары келіп түскен барлық өтініштің әрқайсысын жеке бақылауға алатындарын жеткізді.
Асан МЫРЗАХАНОВ,
«Семей таңы»
