Өткен жылы Семей өңірінің шаруа қожалықтары асыл тұқымды мал шаруашылығын дамытып, өнім сапасын арттыруға 869,3 млн. теңге субсидия алған.
Оның ішінде ірі қара малының аналық мал басын селекциялық және асыл тұқымды жұмыстарын жүргізуге берілген қаражат қомақты. Бұл бағытта Семей өңірінің шаруа қожалықтары 78,7 млн. теңге қаражатқа ие болған. Ал қойлардың аналық мал басымен селекциялық және асыл тұқымды жұмыстарын жүргізуге 16,9 млн. теңге қаражат берілген. Сол сияқты асыл тұқымды және селекциялық ірі қара малды сатып алуға 51 млн. теңге беріліпті. Сондай-ақ өткен жылы асыл тұқымды қойларды сатып алуға мемлекет тарапынан 2,7 млн. теңге, асыл тұқымды жылқы сатып алуға 4,1 млн. теңге, етті бағыттағы тұқымдық бұқаларды күтіп-бағуға 0,7 млн. теңге бөлінген. Айта кетуіміз керек, семейлік шаруалар мал шаруашылығы өнімінің өнімділігін және сапасын арттыруда да мемлекет тарапынан көмек көріп отыр. Нақты айтар болсақ, соның ішінде сүт өндірісінің құнын арзандатуға 3,6 млн. теңге, қымыз өндірісінің құнын арзандатуға 0,8 млн. теңге қаражатқа ие болған. Ал салқындатылған құс еті өндірісінің құнын арзандатуға мемлекет 711,1 млн. теңге қаражат бөліпті.
{jcomments on}- Табынға асыл тұқымды бұқаларды қосқаны үшін де субсидия төленеді. Ауылдағы халық асыл тұқымды мал сатып ала алмайды. Сондықтан да шаруа қожалықтарына асыл тұқымды бұқалар сатып алып, табынға қосса, мемлекеттен көмек көрсетіледі. Бұл өте жақсы. Алайда өңірде ондай шаруалар көп емес. Айталық осы бағытта Приречное мен Ақбұлақ ауылдық округтерінің шаруалары осы игі істі қолға алып отыр. Олар бір бұқаға жылына 104 мың теңге суб-сидия алады, — дейді Семей қаласы ауыл шаруашылығы бөлімінің мал шаруашылығы және маркетинг секторының меңгерушісі Рысгүл Рахым-баева.
Тағы бір ескерерлік жайт — мемлекеттік көмектің арқасында өңірде ірі қара малының басы көбейіп келеді. Айталық, 1 шілдедегі жағдай бойынша, бір ғана жылқы малы 110,1 пайызға, өткен жылғы 28 300 бас жылқыдан 31 100 бас жылқыға артқан. Әрине, бұл көрсеткішке жекелеген шаруашылық құрылымдары айтарлықтай үлес қосуда. Атап айтсақ, «Приречное Агрофирмасы» ЖШС, асыл тұқымды ірі қара мен қой өсірумен айналысатын «Мади-Р» және «Нұр» шаруа қожалықтары, сол сияқты асыл тұқымды жылқы өсіріп қымыз өндіретін «Шөпті-қақ» шаруа қожалығы өз өнімдерімен Семей халқын ғана емес, облыс тұрғындарын қамтамасыз етіп келеді.
А. САМАТҰЛЫ,
«Семей таңы»
