Соңғы уақытта «Спартак» футбол клубын қаржыландыру жағынан қиындық туындағаны көпшілікке белгілі. Сонымен қатар футболдан ҚР бірінші лига командалары арасындағы чемпионатта семейлік футболшылардың сәтсіз ойындары тағы бар. Десе де талай қиындықтарға төзе білген команда биылғы маусымды да аяқтауды көздеп отыр.
Семей қаласының ақпараттық орталығында «Спартак» футбол клубының мәселесі тұрғысында және жергілікті аяқдопшылардың аяқ алысы туралы арнайы баспасөз мәслихаты өтті. Баспасөз мәслихатына қала әкімінің орынбасары Надежда Шарова, қалалық дене шынықтыру және спорт бөлімінің басшысы Мұрат Құржықаев, «Спартак» ФК-ның баспасөз хатшысы Сергей Калинин қатысты.
{jcomments on}Ермак Бидахметұлының ықпал етуімен аталмыш футбол клубының қаржы мәселесі шешілген. Қазіргі таңда ойыншылар 1-ші лигадағы кезекті матчтарын лайықты деңгейде өткізу үшін қызу дайындық үстінде екен. Өз кезегінде Сергей Калинин «Спартак» аяқдоп шеберлері қалған кездесулердің барлығында да басым түсіп, Премьер-лигаға шығуды мақсат етіп отырғанын айтады.
— Футболшылар барлық жағдайды түсініп отыр. Қала әкімімен өткен кездесуден кейін команда мүшелері жеке жиналып, барлық ойындарда бүкіл күш-қайраттарын жинап, қала намысын қолдан бермеуге барын салатынын жеткізді. Бапкеріміз Алексей Петрушин де ойыншыларды жігерлендіруде. Барлық қиындықтарға қарамастан, спартактықтардың береке-бірлігі әлсіреген емес, керісінше, нығая түсті деуге болады. Қайткен күнде де «Спартак» бірінші лига командалары арасында турнир кестесінің жоғары сатысынан орын алу үшін аянып қалмайды, — дейді С.Калинин.
Қала басшысының орынбасары Надежда Шарова келер жылдан бастап семейлік команданың негізінде Шығыс Қазақстанның атынан сынға түсетін ортақ футбол клубының құрылуы ықтимал екенін жеткізді. Қала әкімінің орынбасары бұл орайда жерлес футболшыларға облыс тарапынан қолдау көрсетілетінін айтады.
— Семейде өзіндік футбол дәстүрі қалыптасқан. Қазақ футболының қазығы да біздің қаламызда қаланғаны баршаға аян. Ермак Бидахметұлы команда ұжымымен кездесіп, жағдаймен танысты. Қала басшысының келіссөздер жүргізуінің нәтижесінде спартактықтар биылғы чемпионатты соңына дейін жеткізуге мүмкіндік алды. Ал келер маусымнан бастап шаһарымызда өңіріміздің намысын қорғайтын ортақ футбол клубы құрылады деп күтілуде. Бұл өз кезегінде көптеген түйткілді мәселелердің түйінін тарқатуға септігін тигізетіні даусыз. Мәселен, «Спартак» ойыншыларының өзге қалалардағы кездесулеріне қала бюджеті есебінен қаржыландыру жүргізіліп отыратын. Оның қала қазынасына әжептәуір салмақ түсіретіні де жасырын емес. Ал аймақ атынан бақ сынайтын ортақ команда жасақталған уақытта, жағдайдың мүлдем басқаша болатыны анық. Бұл орайда аяқдоп шеберлеріміз облыстық дене шынықтыру және спорт басқармасының қарамағына өтіп, ұжымның әлеуметтік мәселелері бір жақты болып шешілер еді,- дейді өз сөзінде Н.Шарова.
Айта кету керек, биылғы футбол науқанында спартактықтарға 12 кездесу өткізу ғана қалған. 6 ойында жерлес саңлақтар қарсыластарын өз алаңында қабылдаса, қалған 6 матчты сырт алаңда өткізетін болады.
Жақсылық МҰРАТҚАЛИ, «Семей таңы»
