Абай Құнанбаевтың туғанына 170 жыл толуына орай, Семей шаһарында дәстүрге айнал-ған «Аула күні» мерекесі аталып өтілді. Өткен жылдан бері аталып келе жатқан мерекені әдеттегідей «Жанұя орталығы» қоғамдық бірлестігі қолға алып, биылғы шараны қаламыздағы Победа көшесі, 16 мекенжайында ұйым-дастырды.
«Аула күні» мерекесіне Семей қаласы әкімінің орынбасары Надежда Шарова, БҰҰ Даму бағдарламасының кеңесшісі Жанна Жибраева қа-тысты. Ең алдымен Надежда Васильевна аула тұрғындарын айтулы мерекемен құттықтап өтті.
{jcomments on}- Отбасы – әр адамның өмірінде ең қымбатты әрі бағалысы саналады. Бұл туралы айтудың өзі артық болар. Бүгінгі мерекенің Абай Құнанбаевтың 170 жылдығына арналып отырғанының өзіндік мәні зор. Өйткені данышпан Абай барша адамзатты қайырымдылыққа, еңбек-қорлық пен шыдамдылыққа үндеді. Яғни, бір сөзбен айтқанда, бүгінгі жасөспірімдерді тәрбиелеуде қажеттінің барлығын айтып кетті. Осы ретте бүгінгі қоғамда отбасының алар орны ерекше. Сіздерді қала әкімі атынан айтулы мерекемен құттықтай отырып, отбасыларыңызға тыныштық, береке-бірлік, мықты денсаулық тілеймін, — деді Н.Шарова.
Мерекелік шара барысында ауланың үлгілі отбасылары түрлі номинациялар бойынша марапатталды. Олардың қатарында ұстаздар, тыл ардагерлері мен қарапайым аула тұрғындары бар. Кейін бірнеше отбасынан құралған жанұялар өзара сайысқа түсіп, арнайы әзірленген бағдарлама бойынша ауланың үлгілі отбасын анықтады. Осылайша, аула тұрғындары қоғамдағы татулық пен бірліктің негізі отбасы құндылықтары екенін дәлелдеді. Қоғамдық ұйым басшысы Людмила Асташкинаның айтуынша, аула күні мерекесі дәстүрлі түрде өткізіліп келеді.
— Өткен жылы «Аула күні» мерекесін алғаш рет қолға алып, екі аулада осындай мерекелік шаралар ұйымдастырылған еді. Ондағы мақсатымыз — аула тұрғындарының бос уақытын тиімді пайдалану, салауатты өмір салтын қалыптастыру. Шара аясында тұрғындарға медициналық тексеру жұмыстары да жүргізілуде. «Аула күні» мерекесін атап өту, аула тұрғындарын бір-бірімен таныстырып, қоршаған ортаға көтеріңкі көңіл — күй сыйлайды. Ең бастысы, отбасы татулығын насихаттайды, — дейді Л.Асташкина.
Айтулы шара барысында балдырғандар да сырт қалған жоқ. Аула бүлдіршіндерінің кез келгені өздеріне арналып ұйымдастырылған «Менің отбасым» сурет салу сайыстарына қатысуға мүмкіндік алды. Сонымен қатар мереке аясында Абайдың өлеңдері оқылып, әсем әуендер шырқалды. Айта кетуіміз керек, мереке барысында ұйымдастырылған сайыстардан кез келген аула тұрғыны сыйлықсыз қалған жоқ. Сондай-ақ мереке аясында тұрғындар маммографиялық көлікте тексеріле алса, салауатты өмір салты орталығы мен дәрігерлер өз кеңестерін берді. Бұдан өзге тұрғындар «Жанұя орталығы» қоғамдық қорының заңгерінен тегін құқықтық кеңестер ала алды.
— Біздің негізгі мақсатымыз — кез келген жанұямен жұмыс жасау. Ол түрлі жағдайларды басынан өткерген отбасы немесе қалыпты жанұя болуы мүмкін. Сондықтан әрқашан көмек қолын созуға дайынбыз. Өздеріңіз білесіздер, қоғамдық ұйым жанында дағдарыс орталығы да жұмыс жасайды. Дағдарыс орталығына кез келген отбасы келіп, мәселелерін көтере алады. Оларға мемлекеттік мекеме қызметкерлері мен құқық қорғау ұйымдары тарапынан көмектер көрсетіледі, — дейді Л.Асташкина.
Шара соңында түрлі сайыстарға қатысқан отбасылар мен өзге қатысушылар әртүрлі номинациялар бойынша дипломдар, алғыс хаттармен, сыйлықтармен марапатталды.
Асан МЫРЗАХАНОВ, «Семей таңы»
