Бүгінде Семей темір жолының 100 жылдық мерекесіне даярлық жұмыстары қызу жүргізілуде. Мереке қарсаңында шағын станциялар мен жол айрықтарындағы теміржол нысандарын көріктендіру, абаттандыру, онда еңбек ететін теміржолшылар игілігі үшін жұмыс орындарын жайлы ету, әсіресе жол шаруашылығындағы нысандарды жөндеуден өткізу ісі күн тақырыбында тұр. Бұл ретте ілкімді шаралар қолға алынуда.
Бірінші кезекте Семей темір жол вокзалының ішкі-сыртқы көрнекілігі назарға алынды. Жуырда бекеттің қасбетіне 100 жылдық мерекеге орай үлкен тақта орнатылды. Оның себебі патшалы Ресей заманында өңірімізде жүргізілген айтулы құрылыс саналатын темір жол төсеу ісі бірінші кезекте дәл осы Семей темір жол вокзалының іргетасын қалаудан басталған болатын.
{jcomments on}Қазіргі күні ҚТЖ ҰК АҚ Семей жол бөлімшесінің басшысы Марлен Көкірекбаевтың бастамасы бойынша мерейтойға даярлық жұмыстарының негізгі кезеңі аяқталды. Оның аясында бөлімшенің бас ғимараты алаңында гүлдендіру, көріктендіру жұмыстары жүргізілген болатын. Бұл шара ғасыр тойының төл иегері Семей станциясында да қарқынды түрде қолға алынды.
Сондай-ақ биылғы жылы қызметіне 100 жыл толатын Семей-Локоть телімі бойындағы Ауыл, Белағаш, Дүйсекен станцияларында да көріктендіру ісі қолға алынды. Бүгінде толық күрделі жөндеуден өтіп, қайта жаңғырған станциялар ғимараты тарихи-мәдени ескерткіш ретінде жергілікті әкімдік тарапынан арнайы тіркеуге алынған. Сол себепті де олардың маңайындағы гүлдендіру, көркейту шараларына тек теміржолшылар ғана емес, жергілікті тұрғындар да ықыласты. Қазіргі күні 4-ші класқа жататын станцияларда сенбіліктер жиі ұйымдастырылады. Семей мен Локоть арасындағы телімнің ұзындығы 119,7 шақырым, әрі пойыздар ұзағырақ аялдайтын негізгі үш станция осылар.
Бұл ретте Белағаш станциясы алдыңғы жылы күрделі жөндеуден өткен еді. Нысанның жылу желілері мен кәріз жүйелері толық ауыстырылып, жаңарды.
Станция басшысы Александр Белич алдағы тамызда аталып өтетін жүз жылдық мерейтойға даярлық шаралары қарқынды жүріп жатқанын, соның аясында станция маңына гүлзарлар өсіруді де қолға алғанын жеткізді.
Ал Ауыл станциясының басшысы, темір жолда 44 жыл еңбек өтілі бар Досан Әміров салынғанына 100 жылдан асқан нысандардың әлі күнге дейін сыр бермегенін айтады. Жыл сайын ағымдағы жөндеу жүргізіліп, ерекше күтімде ұсталады. Биыл да теміржолшылар станция ішіне әрлеу, стенділерді жаңалау жұмыстарын жүргізуде. Сонымен қатар қысқа әзірлік құжатын жылдағыдай ерте даярлап, уақытынан бұрын тапсыру көзделуде.
Семей жол бөлімшесі әкімшілік-шаруашылық бөлімінің басшысы Болат Муслимов шалғайдағы шағын станциялардың материалдық мүмкіндіктері толық екенін, үстел-орындық, компьютерлер тәрізді тұрмыстық бұйымдар жаңартылып, кейбірі жаңадан қамтылғанын айтады. Сондай-ақ Аягөз-Жарма, Жарма-Шар-Семей телімдеріндегі бірқатар станциялардағы балалардың ойын алаңы жаңартылмақ. Бұл өз кезегінде теміржолшыларға арналған мерекелік тарту болмақ.
Қ. ӘЛІМБЕК, Семей қаласы.
