Біраз жыл бұрын қала сыртындағы қарағайлы орманға жанұя құрған жастардың барып, бос бөтелке байлайтын «дәстүрі» бар болатын. Білетіндер «бос бөтелке байлау» сол бір кеңестік кезеңде басталғанын айтып жүретін. Ал осының (дәстүр демей-ақ қоялық) кесірінен табиғат көркі — ағаштар мен қоршаған ортаға келер зиян айтпаса да түсінікті. Соңғы жылдары «бөтелке байлайтындарға» тосқауыл қойылғандай еді. Алайда жас үйленгендердің тағы да орманға қарай ағылатын түрлері бар. Өйткені соңғы алты жыл көлемінде жастар үшін, табиғатты қорғау мақсатында құрылған «Махаббат ағашы» жақында металл қабылдау пунктіне өткізіліп кетті. Мұндай қадамға жоба авторының өзі барды.
{jcomments on}Естеріңізде болса, Семейде «Махаббат ағашы» 2009 жылы тұрғызылды. Темір металдан жасалған ағаш бұтақтарына жас жұбайлардың есімдері жазылған құлыптар бекітілетін. Құлып бекіту беріктік пен тұрақтылықтың белгісі саналды. Бұл “ағашқа” өз құлыптарын тек жаңадан отау құрған жандар ғана емес, бір-біріне ғашық жандар мен жақсы достар да бекіте алған еді.
Негізгі идеяның авторы семейлік кәсіпкер Серік Уәлиханов деген азамат еді. Ол темір ағаш арқылы тірі ағаштарды жас үйленгендерден құтқару мақсатын көздеп, «Махаббат ағашын» құруды қолға алады.
Шаһарымызда отбасын құрған жас жұбайлар достарымен қарағайлы орманға барып, ішілген шампанның бос бөтелкесін ағаштың ең биік жеріне байлайтынын бәрі біледі. Бұл тіпті орындалуы керек ереже іспетті. Ал тереңнен ойлап қарасаңыз, отбасымен қарағайлы орманға демалуға шыққандар қарағай толған бос бөтелкелердің куәсі болады. Оның үстіне орманды ластап, сынған бөтелкелерге толтырып жатқаны тағы бар.
Серік Уәлиханов дәл сол жастар баратын жерден екі жүк көлігімен бос бөтелкелер сынықтарын шығарған. Ол осы экологиялық шарадан кейін семейліктерге «Махаббат ағашын» салтанатты түрде ашып берді. Ал жаңа темір ағаш кәсіпкердің кеңсесінің алдында болды. Жас жұбайлар бастаманы бірден қолдап, «Махаббат ағашы» жас жұбайлардың мәңгі махаббаттарының символына айналды. Қаланың көрікті жерлерінің бірі болды. Дегенмен бұл “ағаш” жақында металл қабылдайтын орындардың біріне өткізілгенін айттық. Игі бастаманың неліктен осындай жағдайға барғанын жоба авторы Серік Уәлихановтың өзінен сұрап білдік.
— Осы уақыт аралығында жұмысымыздың бағытын өзгерттік. Балалар айналысатын би мектебін ашқан болатынбыз. Ал «Махаббат ағашы» терезе түбінде орналасқандықтан, ол жерде күнде айғау-шу, ішімдік ішкендер жүреді. Сосын мен жас жұбайлардың сүйікті орнына айналған «Махаббат ағашын» қалалық әкімдікке, одан кейін неке сарайына шығып, өз қарауларына алуды өтіндім. Барлығы да бас тартты. Екіншіден, жақында болған қатты желде ағаштың бір бөлігі мен құлыптар ұшып кетіп, адамдарды жарақаттай жаздаған. Шағым айтып келгендер де болды. Міне, «Махаббат ағашын» алудағы негізгі себептер — осы, — дейді кәсіпкер.
Әрине, бұл іске сын айтып жатқандар да жетерлік. Кейбірі кәсіпкерге «ағашты металл қабылдайтын жерге өткізіп, пайда таптың» деп те кінә артқан екен. Дегенмен одан алынған қаражат құрылғыны жасаған жұмысшыларға берілген. Осылайша, Семейде қарағай басына ағаш ілу дөрекі дәстүрі қайта жанданды десек болады. Қазір тек қарағайлы орман ғана емес, семейліктердің сүйікті демалыс орындарының бірі Түйемойнақ аралы да зиян шегіп отыр.
Айта кетуіміз керек, бұл тұста Серік Уәлиханов семейліктерге «Жастар аллеясын» ашуды ұсынған. Жаңа үйленген жас жұбайлар жастар бағында бір-бір ағаш көшеттерін отырғызса, уақыт өте келе махаббат орманына айналар еді. Дұрыс-ақ! Дегенмен, ырымшыл халықпыз ғой. Осы жерде сезімдерін құлыптаған жас жұбайлардың шаңырақтары биік болсын деп тілегеннен басқа амал жоқ.
Асан МЫРЗАХАНОВ,
«Семей таңы»
